DUMAGUETE CITY - Nasikop sa mga sakop sa kapulisan ang usa ka level 3 nga tigpayuhot og gidiling drugas niadtong miaging adlaw sa may Sitio Canday-ong, Barangay Calindagan ning dakbayan sa Dumaguete.

Ang nasikop giila nga si Winefredo Armentano alyas “Wiwin” ug mulopyo sa naasoyng lugar.

Gironda sa mga sakop sa Provincial Anti-Illegal Drugs Special Operation Tasks Group (PAIDSOTG) pinangulohan ni P/CInsp.Benedick Poblete ubos usab sa pagmando ni P/SSupt. Dionardo Bernardo Carlos ang bag-ong milingkod nga direktor sa Negros Oriental Provincial Police office (NOPPO).

Inabagan usab sa mga sakop sa National Bureau of Investigation (NBI) pinanguluhan ni Atty. Dominador Cimafranca ug ingon sa PDEA.

Ang operatiba miadto sa balay ni Armentano bitbit ang search warrant nga giisyu ni Judge Gerardo Paguio penitsahan og Hulyo 17 ning tuiga.

Sa gipahigayong pagpangronda sa balay nakuhaan kinig 10 ka pakete shabu nga nitimbang kinig 45 gramos ug mobalor og P531,000.

Sumala ni Poblete nga si Armentano usa ka level 3 drug pusher nga makabaligya kinig shabu nga di mominos sa P100,000 ug adto kini ibaligya sa lungsod sa Mabinay isip distributor.

Gikalipay ni Carlos nga nakahimo gilayon siyag dakong kalampusan ug iyang gipasalamatan si Gob. Roel Degamo sa suporta nga gihatag niini.

Dugang ni Poblete nga ang manghod ni Armentano nasikop usab sa kapulisan gumikan usab sa shabu sa samang panimalay ug karon anaa na sa bilanggoan.