ORMOC CITY - Duha ka lalake ang nasikop sa kapulisan sa Police Station 3 (PS3) nunot sa pagdalag armas ug gituhoang shabu duol sa panimalay sa usa ka notadong ‘drug lord’ sa Barangay Tambulilid.
Ang duha giila nga sila si Junly Ruizo, 21, ulitawo ug nagpuyo sa Sitio Kanipaan, Barangay Tambulilid samtang ang usa giila nga si Erldel Alburo, 28, traysikol drayber ug taga Barangay Curva ning dakbayan.
Base sa report sa kapulisan, naglibot ang kapulisan sa Barangay Tambulilid gumikan sa nahitabong pagpamusil nianang alas 11:00 sa buntag.
Nakit-an sa tropa sa Ormoc City Public Safety Company (OCPSC) ang duha ka suspek nga naglakaw sa samang direksyon.
Nasigpatan sa duha ka suspek ang patrol car sa kapulisan nga nagsunod ug sa karatol kalit kini nga nanagan.
Nakit-an sa kapulisan nga gilabay ni Ruizo ang usa ka panapton nga giputos sa wa niini nga kamot nga nagkupot sa kalibre .45 nga pistola nga dunay unom ka bala ug gidali niini pagsuksok sa atubangan sa short.
Sa pagkasikop sa duha, si Ruizo nakuhaan usab og usa ka pakete sa gituhoang shabu ug salapi nga P2,180.
Samtang si Alburo nakuhaan og drug paraphernalia ug salapi nga P160.
Ang pagkasikop sa duha nahitabo ala 1:00 pasado sa hapon niadtong Martes, pipila ka oras gikan sa nahitabong pagpusil sa usa ka Jose Cobero kinsa luwas na ang kahimtang.
Padayon pa nga gipangita ang suspek nga si alyas Akmad.
Giklaro ni PS3 chief Tyronne Mark Cartalla nga way koneksyon sa pagpamusil ang duha nga nasikop ug posibling di mao ang armas nga nakuha sa armas nga gigamit pagpusil.