MOHATAG og libreng medical equipment ang Brilliant Metal Craft (BMC) nga balor og P20 milyones ngadto sa Cebu City Medical Center (CCMC) nga magsilbing hulip sa mga oxygen tank nga ginama sa puthaw aron limpyo nga hangin ang mahanggap sa pasyente nga malandig sa tambalanan.
Kini ang gibutyag ni Dr. Edward Dampor Sr., tag-iya ug presidente sa BMC diin makadaginot usab ang mga pasyente inay magbayad sila og linibo.
“Sa pagkakaron ang atong purpose ini mao ang pagpahibawo sa katawhan sa Sugbo nga ang BMC mo-donate og P20 million worth of medical equipment sa CCMC and this is about mobuhat og oxygen nga less than P100 ra ang tanke,” pasabot ni Cadampor.
Si Bise Mayor Edgardo Labella, personal nga nihangyo kang Dampor bahin sa maong proyekto apan wala makatambong sa tigom kagahapon sa Radisson Blue Hotel gumikan sa iyang meeting sa Manila.
Si Labella nipasabot nga dako kini og ikatabang ngadto sa mga Sugbuanon nga malandig sa CCMC.
Ang pagtaod sa P20 milyones nga ekipo pagahimuon human sa katukoran sa bag-ong CCMC nga gikatakdang gastuhan og P1.3 bilyones.
Ang Visayas Community Medical Center maoy unang ospital nga naggamit sa maong pasilidad kansang agianan sa oxygen ginama sa copper nga dili mataptan og taya.
Iyang gipasabot base sa ilang gihimo nga pagtuon, ang mga oxygen tank nga maoy sagad gigamit sa mga tambalanan napuno sa taya ang ilawom nga bahin niini sanglit ang moisture, oxygen ug puthaw.