KATORSE na ka mga indibidwal ang biktima sa red tide sa lalawigan sa Bohol, sumala sa Bureau of Fisheries and Aquatic Resources (Bfar) 7 kagahapong adlawa.
Ang pito niini nakagawas na sa tambalanan samtang, ang laing pito padayon nga nagpaayo.
Ang red tide nagsugod niadtong Biyernes sa miaging semana apan nakaluwat og advisory ang Bfar 7 niadto lang Miyerkules.
Sagad sa mga biktima mga mamalitay o kadto kustomer nga wala mahibaw sa maong red tide.
Matod ni Bfar 7 assistant regional director nga si Dr. Allan Poquita nga nahinabi sa Sun.Star Superbalita kagahapon nga padayon ang ilang monitoring nga gihimo diha sa barangay Songculan ug Totolan sa lungsod sa lungsod sa Dauis.
Dugang ni Poquita nga mokabat duha ngadto sa tulo ka kilometro ang gilapdon sa maong red tide.
Usa sa rason niini kining dry spelll o kining nasinati nga weak El Niño.
Nitataw pa si Poquita nga naabot na usab sa Tagbiliran City ang maong dry spill ug padayon kini nila nga gi-monitor.
Ilaha na usab nga gi-cordone ang maong lugar pinaagi sa Bantay Dagat sa local government units sa maong lugar.
Lakip nga ilang gi-monitor ang kadagatan sa siyudad sa Bogo ug sa lungsod sa Medellin dinhi sa Sugbo aron dali nga masuta kon mokatag ang maong red tide.
Gidid-an na sa Bfar ang tanang mangingisda nga haduol sa dapit nga dili una managat ingon man nga mosuway pagkuha og mga kinhason kay mao kini ang dali nga apektohan.
Luwas ra mokaon og isda apan wala ra hinuon nila gitugyan ang mga mananagat nga manguha og isda sa maong dapit.
Awhag niya sa mga mopalit og isda nga limpyohan og maayo kini bag-o lutuon ug kan-on.
Ang maong red tide tungod kini sa talagsaon nga pagdagsang sa makahilo nga algae, matang sa gagmayng tanom o organismo nga natural nga anaa sa ilawm sa tubig dagat.
Anaay talagsaon nga kondisyon susama sa taas nga huwaw nga modagsang kini nga moresulta sa nagkausab nga klima.
Samtang, dili layo nga moabot sa kadagatan sa Sugbo ang red tide gikan sa silingang lalawigan sa Bohol.
Si Virgilio Jakosalem, provincial agriculturist, nipahimangno sa paglikay una sa pagkaon og seafoods, ilabi na sa bisan unsang matang sa kinhason.
Gawas sa mga seashell, mahimong maapektohan sab sa red tide ang mga gi-culture nga talaba ug bangus ingun man dunay pipila ka mga isda nga sama sa tamban ug tabugok.