NATALA sa Philippine Atmospheric, Geophysical and Astronomical Ser­vices Administration sa niaging gabii ang labing kusog nga uwan sa Sugbo karong tuiga sukad nasinati ang El Niño.

Si Engr. Al Quiblat, officer-in-charge sa Pagasa Mactan, nagkanayon nga niabot ngadto sa 75.2 millimeters ang dalang tubig sud sa 39 minutos gikan alas 10:22 hangtod sa alas 11:01 sa gabii.

Siya nipasabot kon isukod kini sa usa ka kilometer square area, pananglitan gikan sa dakbayan sa Sugbo hangtod sa siyudad sa Mandaue, miabot og 35,000 ka mga barrel ang nihagsa nga uwan.

Tungod sa kusog nga uwan pipila ka dalan sa Metro Cebu ang gibahaan.

Atol sa conference sa Local Disaster Risk Re­duction and Management Officers sa Kapitol­yo kagahapon, si Qui­b­lat nipahibawo nga bisan og ting-uwan, normal lang nga moundang ang uwan og usa ka adlaw ngadto sa usa ka semana tungod kay anaay El Niño ug gumikan kay nag-usab-usab ang dagan sa panahon.

Matod niya tungod sa inter tropical convergence zone sa Pacific Ocean, ang Sugbo makasinati og hinay ngadto sa kasarangan nga pag-uwan ug usahay kusog nga uwan tungod sa thunderstorm sa kahapunon ug kagabhion sa mosunod nga upat ngadto sa lima ka adlaw, apil kagahapon.

Si Quiblat namaha­yag nga puwede dunay bagyo nga mosud sa nasod sa sunod semana.

Siya nipasidaan nga dunay kahigayonan nga mokusog ang El Niño sa di pa matapos ang 2015 tungod kay base sa record sa Pagasa ang Sugbo nakasinati og huwaw ni­adtong Mayo.

“So, it’s very alarming my friend,” pahayag ni Quiblat.

Base sa ilang record, niabot lang og 18.0 mm ang pagbunok sa uwan niadtong Mayo, nga mas ubos kon itandi sa 123 mm nga ilang natala base sa ilang 38 period nga record.

Hangtod alas 8 sa bun­­tag kagahapon, nia­bot na og 194.4 mm ang na­s­inati nga uwan sa Sug­bo gikan sa Hunyo 1-26, nga mas taas og ga­may sa average normal rainfall nga 183.3 mm.

Tungod sa gipaabot nga mobangis ang El Niño, ang probinsya sa Sugbo namalit na daan og hose ug ubang butangan og tubig.

Si Baltazar Tribunalo, pangulo sa PDRRMO, nag­tinguha ang Kapitol­yo nga magbutang og 10 ka water impounding areas sa mga lungsod sa Dalaguete, Argao, Conso­lacion, Tuburan, Alcoy, Alegria, Sibonga ug Barili.