Rabacal: Mga balaud nga walay epek

DAGHAN kaayong mga balaud ug ordinansa nga wala mapatuman sa mga otoridad.

Dinhi sa ato daghang dili motuman sa mga ordinansa sama sa anti-jaywalking, anti-littering, anti-smoking, curfew ug uban pa. Naa usay anti-mendicancy ordinance nga nagdili sa pagpakilimos ug paghatag og limos apan daghang makililimos sa atong kadalanan. Wala usab mahunong kining mga bata nga manaygon sa mga sakyanan sa kadalanan.

Wala usab tagda sa ka­daghanan kining nationwide anti-smoking ban ni Pres. Duterte. Karong bg-o, gisugo sa presidente ang mga pulis ug mga opisyal sa barangay nga dakpon ang tanang mag-inum og ilimnong makahubog sa daplin sa kadalanan.

Kon nahimo kini ni Duterte sa mayor pa siya sa Davao ug ni Marikina Mayor Bayani Fernando way katarungan nga dili kini mapatuman sa ubang local government official.

u25cf ● ●

Daghang gipili-an sa Barug Team Rama nga ipuli kang Konsehal Nendell Hanz Abella nga nanumpa sa pagka-commissioner sa National Labor Relations Commission (NLRC).

Human mi-resign si Konsehal Abella dunay tulo ka ngan ang gihisgutan nga mopuli kaniya. Sila mao si Renato Osmeña, Jr., Lutlut Ignacio-Son ug kanhi Mayor Mike Rama.

Bisan kon adunay report nga naninguha kuno ang Bando Osmeña – Pundok Kauswagan (BOPK) nga ang ilang rekomendado ang matudlo ni Pres. Duterte puli kang Konsehal Abella apan tungason kini.

Klaro kaayo sa Local Go­vernment Code nga ang mopuli sa mabakanteng pwesto sa konseho sa highly urbanized cities sama sa Cebu City itudlo sa presidente, pinaagi sa executive secretary. Magagikan siya sa partido sa mi-resign nga konsehal. Kay si Abella midagan man sa pagka-konsehal ubos sa Team Rama – United Nationalist Alliance (UNA) kinahanglang ang maong partido maoy mo-nominate ngadto sa presidente sa ipuli kaniya.

Akong awhagon si ex-mayor Mike Rama nga dili siya magpada sa hulhog sa iyang kapartido nga siya ang magpa-nominate puli kang Abella kay tingalig mauwawan lang siyag samut kon dili pirmahan ni Pres. Duterte ang iyang nominasyon. Salikwaut man gud sa presidente nga itudlo niya pagka-konsehal ang usa ka tawo nga iyang gipasangilang nalambigit sa ginadiling drugas.

Sugal hinuon kini, kon itudlo siya magpasabut nga gibakwi na ni Duterte ang iyang pasangil kang Rama apan ang kuyaw kon kumotun sa pre­sidente ang nomination paper ug magyawyaw pa gyud nga makahatag og dugang kauwaw kang Mike Rama.

Unsolicited advice nako sa kanhi mayor nga kalimtan kining pagka-konsehal ug paabuton nalang ang resulta sa iyang election protest batok kang Mayor Tomas Osmeña.

(msr1144@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph