LABING minos 150 ka mga balay sa tulo ka mga sityo sa Mambaling, dakbayan sa Sugbo ang nanga­ugdaw sa sunog kagahapon sa hapon.

Linya sa kuryente nga mikayo ug ang baga nanga­hulog sa usa ka balay nga gama sa light materials maoy gibasol sa sunog, nga ang alarma nadawat sa kabomberohan mga alas 5:28 sa hapon.

Matod ni SFO1 Edwin Halandayan sa Cebu City Fire Department nga ang sunog nagsugod sa balay ni Hazel Ceballos ang sunog.

Ang balay ginama sa light materials hinungdan nga da­ling nakadako ug nikaylap sa mga balay sa mga silingan.

Matod ni Handalayan nga matod sa mga tawo nga ka linya sa kuryente ang mi-spark sa wa pa ang sunog.

Ang mga baga niini nahulog ngadto sa balay sa pamilyang Ceballos dayon miulbo ang kayo.

Nikaylap kini ngadto sa mga balay sa mga sityo Tugas, Mangga ug De los Reyes.

Sa pagsuwat ning taho, wa pa mahibaw-i kon pila ka mga pamilya ang nangaapektuhan.

Kasamtangan silang gipahimutang sa sports complex nga naa sa likod sa San Roque Parish.

Wa pa mahibaw-i kon pila ang kinatibuk-ang danyos sa sunog.

Wa maglisod ang kabomberohan sa pagkombate kay dunay gagmay nga mga dalan nga maagian.

Nakamugna og trapiko ang sunog sa mga dalan N. Bacalso, Mambaling access road ug South Road Properties.

Gisirhan sa City Traffic Operations and Manage­ment (Citom) ang Mambaling access tungod sa ka­daghan sa mga firetruck nga mikombate sa kayo.

Samtang sa dakbayan sa Mandaue, gibanabana nga mokabat og P300,000 ang  danyos sa sunog nga miugdaw sa usa ka junkshop sa dalan J.P. Rizal, Brgy. Basak niadtong Huwebes sa gabii.

Bisan ang kakusog sa pagbunok sa uwan wa gi­hapon kini makapawong sa kayo nga midilaab mga 11:35 sa gabie. 

Way naangol ug kinabuhing nakalas atol sa hitabo.

Matod ni SFO1 Glenn Campilan sa Bureau of Fire Protection (BFP) sa Mandaue nga ang maong shop gipanag-iya ni Alvin Abayan, 43, minyo.

Ang maong sunog giisa dayon ngadto sa ikatulong alarma, apan atol ning pagsuwat padayon pa nga giim­bes­tigar sa kabomberohan ang hinungdan sa maong sunog.

Gitataw ni Campilan nga ang sunog didto magsugod sa kisami sa junk shop.

Dugang niya nga duha ka oras usa napawng sa kabomberohan ang kayo.

Hinuon nakontrolar na nila ang sunog 20 minutos pa lang sa pag- ulbo niini. 

Sigun pa ni Campilan nga wa hinuoy naangin nga balay tungod kay nasud man kini sa usa ka compound.