MOPAKITA na sab og aksyon ang batan-ong kickboxer sa Sugbo nga si Ken ‘Shaolin’ Caniga sa Bakbakan sa Sugbo karong hapon sa Cebu City Sports Institute sa Brgy. San Nicholas, ning dakbayan.
Si Ken, kinsa pag-umangkon ni YawYan Ardigma CEO Master Benigno “Ekin” Caniga Jr., makigharong kang Diether ‘Jet’ Sanchez.
Nagkanayon si Master Ekin, kinsa mao sab ang coach ni Ken, nga nagsilbe kining tune-up fight ni Ken sa dili pa kini mokampanya alang sa Batang Pinoy karong tuiga.
Sa miaging tuig, si Ken nakadaog og duha ka gold medals sa Muay Thai event sa Batang Pinoy National Championships hinungdan nga napili siyang usa sa mga awardee sa Sportswriters Association of Cebu.
Gipasabot ni Master Ekin nga adunay tanyag aron mag-training si Ken sa national team wala pa nila dawata ang tanyag kay nakatutok sila sa Batang Pinoy.
Si Josh ‘Buffalo’ Ybanez, moaway batok kang Benedict ‘Lil Warrior’ Torbiso. Magsangka sila si Rodel ‘Pitbull’ Valisado sa Unfied MMA ug Johniel Castro sa Tatus MMA.
Aduna pa’y dugang lima ka mga away ang masaksihan sa promosyon, nga usa ka grassroots development program sa Cebu City Sports Commission.