DAVAO DEL SUR - Malinawon ang tibuok probinsiya sanglit way gihimong kasikas ang mga militanteng pundok atol sa deklarasyon sa National Day of Protest ni Presidente Rodrigo Duterte niadtong Huwebes, Septembre 21.
Apan bisan pa niini, todo-alerto ang tanang puwersa sa kapulisan sa tanang kalungsuran apil ang mga sakop sa Criminal Investigation and Detection Group sa probinsiya.
Sa Bansalan, nagbutang og checkpoint ang 5th Maneuver company sa Davao del Sur Police Provincial Office aron sutaon ang mga sakyanang mosulod gawas sa lungsod.
Subay sa mando ni Senior Superintendent Samuel Gadingan, police provincial director, angayang di mokompiyansa ang tanang istasyon sanglit nagpabilin gihapon ang hulga sa mga rebeldeng New People's Army.
Sanglit way trabaho ang mga opisina sa gobyerno ug way klase ang mga pampublikong tunghaan, apil ang pipila ka mga pribadong eskuwelahan mao nga daghan ang nagsuroy-suroy sa mga laaganan.
Sa dakbayan sa Digos, gipakatag sab sa Digos City Police Office (DCPO) ang ilang mga ginsakpan sa publikong terminal aron luwas ang mga pasaherong mosulod-gawas dinhi.
Mapasalamaton sab ang DCPO sanglit way kisaw nga gihimo ang mga progresibong pundok mao nga padayong nagmalinawon ang dakbayan.
Hinuon, andam kanunay ang kapulisan nga moresponde sa taknang adunay mahitabong kaguliyang sa probinsiya. (Orlando B. Dinoy)