Parks wa makuha sa drafting apan giimbita sa Mavericks

GIKATAHO nga si kanhi UAAP MVP Ray Parks usa sa duha ka mga mag­duduwa nga gikonsiderar sa Dallas Mavericks nga pilion isip 52nd pick sa National Basketball Association (NBA) Rookie Draft kagahapon sa New York.

Mao kini ang gibutyag ni Charlie Dy, basketball agent sa anak ni kanhi Philippine Basketball Association (PBA) legendary import Bobby Parks.

Ang gipili sa Mavericks mao ang 7’2” Indian center nga si Satnam Singh Bharama.

Si Bharama, 19, maoy labing unang basketbolista sa India nga nasulod s NBA.

Wala pa nakaduwa sukad og professional basketball si Bharama apan nahimo kining sakop sa India national basketball team nga ning­kampanya sa 2013 FIBA Asia Championships sa Manila.

“I was told it was a choice bet­ween the Indian and Ray whom they thought would be picked earlier,” men­­sahe ni Dy sa iyang Twitter account nga migawas sa InterAksyon.com.

Ang Mavericks maoy usa sa upat ka teams nga gisuwayan ni Parks paghaylo pinaagi sa pag-apil sa ilang praktis. Ang laing tulo mao ang Utah Jazz, Brooklyn Nets ug Boston Celtics.

Si Parks nagsugod paggukod sa iyang pangandoy nga makaduwa sa NBA sa miaging tuig dihang giimbitar siya sa Los Angeles Lakers aron mosalmot sa NBA Summer League.

Wala siya mitunga niadtong higayuna.

Apan sa uwahing kalambuan, ang Mavericks miimbita ni Parks nga moapil sa Summer League team.

Niini, nabuhi ang paglaom sa two-time MVP sa UAAP nga maka­duwa sa NBA.