MILAPAS sa tagal nga unom ka bulan ang bahad ni Pres. Rodrigo Duterte pagsumpo sa drugas. Tinubdan ang prisohan ug ang gitumod gikan sa kanasoran.
Mga katarungan nga lisod puhagon ang ilegal nga drugas mao ang pagtumaw sa mga bag-ong players nga mipuli sa mga dinakpan ug napatay, miduwa nga kapolisan, narco-politician, ekonomikanhong aspeto nga gihimong tinubdan sa kapanginabuhian, namalik sa pagsuyop ang mga nadakpan, napriso, natokhang ug na-rehab kay naapektohan ang utok nga maglisod sa pag-usab.
Giugkat ang drugas kay midatom sa nasod hangtod na sa kabarangayan. Gani nangasikop sila si Barangay Kapitan Eduardo Bacalso sa Sangi, Toledo; Eugene Miñoza sa Tupas, Ronda; Denden Bas sa Lagtang, Talisay; Rene Olivar sa Lamintak Norte, Carmen; Epifania Alvizo sa Malabago, Badian; Mario Delfin Tundag sa Manguiao, Asturias.
Jinnefer Mercader sa Logo, Borbon; sila si Barangay Konsehal Rex Baterna sa Lamintak Norte, Carmen; Bernardino Saguisabal sa Bato, Badian; Jejomar Alesna sa Boloc-boloc, Barili; Raul Misa Cole Jr. sa Putat, Tuburan; Romer Abueva sa Ilaya, Ronda.
Romel Solis sa Anahaw, Argao; Irvin Doños sa Catmondaan, Catmon; Camilo Dakaldakal sa Santa Rita, Asturias ug Thelma Sediguchi sa Tuburan Sur, Danao. Apan padayon ang pagpamatay sa mga mosukol ug pagsilot sa mga dinakpan.
Lakip na sa nakontrobersyal niadtong pasangil nga lipot ang pagpatay sa 17 anyos nga Grade 11 nga tinun-an Kian Lloyd delos Santos sa Caloocan. Si Kian maoy drug courier sa iyang amahan ug uyoan.
Wala molaban si Duterte human makasud-ong sa ebidensya nga pangabuso mimando nga ipapriso ang mga polis bisan gipagawas nga misukol. Girelibohan gilayon ang hepe Senior Supt. Chito Bersalona ug giubos sa restrictive custody sila si PO3 Arnel Oares, PO1 Jeremias Pereda, PO1 German Cruz ug Chief Insp.
Amor Cerillo. Mikondenar ang mayoriya sa senado hinungdan sa inbestigasyon ubos sa committee on public order. Sila si Manila Archbishop Cardinal Luis Antonio Tagle ug Archbishop Socrates Villegas nga pangulo sa CBCP nanawagan sa pag-undang sa patay ug mihulagway sa kabililhon sa kinabuhi.
Nagsalig raman god ang taga simbahan kay wala man sila makasinati sa krimen nga binuhatan sa mga naboang sa drugas. Human kang Kian nasundan sa pagpatay ni Carlo Angelo Arnaiz, 19, nga gitorture human manulis sa taxi driver ug kauban Reynaldo de Guzman alyas Kulot.
Entra gilayon ang Commission on Human Rights (CHR) batok sa mga polis. Gisakyan sa politika ang CHR gidid-an na sa pagkuha og records sa PNP. (csa_1156@yahoo.com/0916-734-5737)