Mensahe basaha sa dili pa i-share

BASAHA daan sa dili pa i-share ang mga post sa social media.

Kini ang awhag sa duha ka respetado nga mga sakop sa Cebu media sa mga batan-on aron mapugngan ang pagka­tap sa fake news sa social media.

Sila si Ma. Theresa Villamor-Ilano, associate edi­tor sa SunStar Philippines ug Max Limpag, co-founder sa InnoPub Media ningtudlo sa mga tinun-an sa komunikasyon sa lainlaing mga tunghaan unsaon pag-ila sa fake news ug paglikay nga dili kini mokatap sa social media, atol sa Globe Youth Summit 2017 #ThinkBeforeYouShare sa Performing Arts Hall sa University of the Philippines (UP) Cebu kagahapon.

Si Ilano niingon nga angay nga basahon ug susihon daan sa publiko ang mga post nga i-share sa social media labi na ang tinubdan niini, diin gikan o ang gitawag Uniform Resource Locator (URL) og ug ang kasayoran nga gipaambit.

Matod niya kon kadudahan ang unod sa post mas maayo i-verify ug susihon ang facts niini sa dili pa i-share.

Si Ilano namahayag ang National Union of Journalists of the Philippines (NUJP) sa dunay gi-develop nga plug-in software aron pag-ila sa fake news sa Facebook ug pagpugong sa pagkatap niini.

Samtang si Limpag namahayag nga dili angay moundang sa pagkat-on sa paggamit sa bag-ong teknolohiya kay ang industriya sa media kanunay nag-usab-usab gumikan sa modernong panahon.

Suma pa niini dunay mga sistema nga makasubay sa tinubdan sa fake news.

Ug isip mga keyboard warrior alang sa kamatuoran, siya nidasig sa mga tinun-an nga kon dunay makit-an nga mini nga estorya o post, itaho o ialerto kini ngadto sa sistema sama sa tagdumala sa Facebook nga naa na sa platforms.

Siya nidugang bisan ang yano pag-like sa post sa Facebook nagpadayag nga mahinungdanon kini alang nimo.

“Part of our responsibility as keyboard warriors for truth is to make sure nga if we like, it’s something nga we understand the consequences where in a way endorsing that content into the whole system,” dugang ni Limpag sa summit.

Matod niya ang pagpaambit sa fake news sama sa ningtabang ka pagpakatap niini.

Sa summit, si Limpag nipahinumdum usab sa mga tinun-an nga kanunay magtamod sa traditional journalism values sa pagpangita sa kamatuoran, pag-verify, pagtrabaho sa matuod ug maningkamot alang sa excellence.

Ang naasoy nga summit gipasiugdahan sa Globe Telecommunications ug kabahin sa mga fora ug seminar sa kasaulogan sa 25th Cebu Press Freedom Week, Septiyembre 17-23, 20­17.