ANG Paralympic swimmer Ernie Gawilan sa Davao City, gipanganak nga way paa ug usa ka kamot lang, apan mitindog sa iyang kaugalingon human nadepensahan ang iyang men's 400-meter freestyle S8 sa 9th Asean Para Games swimming competition didto sa National Aquatic Centre, Bukit Jalil Sports City sa Kuala Lumpur, Malaysia niadtong Miyerkules.
Si Gawilan, kinsa pambato sa Pilipinas sa Rio Paralympics niadtong milabay nga tuig, napabilin ang titulo human mioras og 4 minutos ug 57.49 segundos.
Gipildi niya si Vietnam's Dang Van Cong (5:56.09) ug S. Phiphatphong sa Thailand (5:59.94) kinsa nakaplata og bronze sa maong han-ay.
Apan ang 28 anyos nga Dabawenyo, nagbasol dihang pakyas ang iyang paglapas sa rekord.
"Nalipay ko pero nasayangan ko sa time nako sa 400m free kay abi nako ma-break nako akong personal time nga 4:48," ni Gawilan sa Facebook interview nga midugang sulayan niya madepensahan sab ang men's 200m individual medley (IM).
Nakakuha sab siya og platang medalya sa men's 100m butterfly S8 event sa oras nga 1 minutos ug 19.86 segundos.
Si Malaysian James Wong Tien Yu nakabulawan nga mitala og 1:12:94 samtang bronze si Vietnamese Nguyen Quang Vuong (1:23.62).
Si Gawilan duna say duha ka relay bronzes.
Samtang ang kaubang Dabawenyo nga si Smith Billy Carter nakaplata sa Para Table Tennis men's TM4, kauban si teammate Darwin Salvacion.
Ang Pilipinas anaa karon sa ikalimang puwesto sa overall medal tally nga dunay 16 bulawan, 17 plata ug 18 bronzes.
Samtang ang Indonesia nagpabilin nga nanguna nga dunay 90 golds, 51 silvers ug 36 bronzes dayon gisundan sa 68-62-48 Malaysia ug 38-44-51 Thailand sa 11 ka nasud nagtigi sa biennial meet.