ATOL sa National Day of Protest niadtong Huwebes, usa sa gipanawagan karon sa Solidarity of Transport o mas nailang Pinagkaisang Samahan ng mga Tsuper at Operator Nationwide (Starex-Piston) sa Northern Mindanao ang P5.00 nga diskwento sa petrolyo alang sa tanan nga mga pampasaherong sakyanan sa nasod.
Gibutyag ni Ringo Lango, kinsa tigpamaba sa Starex-Piston Northern Mindanao, nga kini nga hangyo sa ilang grupo pangmalungtaron ug makabenipisyo ang mga pasahero ug hilabina ang mga driver.
Kung pagtaas sa plitehan ang ilang pangayuon, dili gihapon kini magdugay kong mahitabo gayud kanunay kining pagsaka ug pag-ubos sa petrolyo.
Apan kung kining P5.00 nga diskwento alang sa mga pampasaherong mga sakyanan nga ihatag mismo sa mga nanag-iya og lana, lifetime kini ug makatabang sa mga driver ug pasahero.
Matud ni Lago nga katungod sa mga driver mo-demand og usbaw nga plite kon dili na gayud makaya ang katas sa presyo sa petrolyo apan mas iprayoridad nila karon nga hangyuon kining diretso nga diskwento tungod kay sayod sila nga ang giangkat nga petrolyo gikan sa gawas sa nasod ang daw ubos na kaayo apan kining mga oil company dinhi sa nasod maoy gakontrolar sa presyo.
Gawas sa diskwento nga gipangayo, buot sab nilang ibasura ang oil deregulation law nga maoy hinungdan makontrolar ang presyo sa petrolyo.
Taliwala daw suntok sa buwan kini nga hangyo apan daw dili kini imposible kung himoan gayud og balaodnon sa kongreso.
“Dili siya imposible tungod kay makahimo man gani sila og walay pulos nga balaod kini pa ba kaha nga dakong ikaayo sa mga driver ug pasahero," matud niini.