MALINAWON ang National Day of Protest niadtong Huwebes nga gipahigayon sa nagkadaiyang grupo tungod kay walay natalang insidente nga gipahigayon sa Magsaysay Park, Divisoria, dakbayan sa Cagayan de Oro.
Kini tungod kay nagpadayag lamang ang mga lider sa ilang mga nagkadaiyang yangungo sa gobyerno lakip na usab sa pagpahunong sa martial law gumikan sa nasinati-an kaniadto nga mga pagpangyatak sa tawhanong katungod diin karong panahona giingong hinay-hinay na nga nasinatian.
“Protest rally panahon sa ika 45 ka tuig nga martial law ni Marcos tungod kay hangtod karon daghan pa kaayo ang mga nanga missing… Ug usab pagprotesta namo sa martial law ni Presidente Digong actually kaning tanan pulos lang pagpadayag sa mga nagkadaiyang mga leaders, sa mga nagkadaiya pud nga organization,” pahayag ni Weldon Barros sa Bagong Alyansang Makabayan (Bayan) Northern Mindanao.
Usa sa mga biktima sa martial law nga si Ka Mark, 60, ang kaniadto nagpadayag sa kasinatian human gidakop sa mga otoridad bisan pa man og wala kini makasala.
Dako ang kabalaka niini nga mautro pa ang kasinatian ilabi na sa mga kabatan-onan karong panahona.
Gilangkoban sa ubay-ubay ka mga grupo ang maong protesta sama sa Kadamay, Starex-Piston, Misamis Oriental Farmers Association (MOFA), Kasama Bukidnon, mag-uuma, mangingisdad ug uban pa.
Samtang bisan pa man sa maong lihok protesta nagmapasalamaton ang kapolisan gumikan kay wala’y nagsabotahe sa kalihokan ug malinawon kini nga natapos.
Ubay-ubay ka kapolisan ang gipakatag atol sa maong adlaw sa Divisoria nga bahin aron mapatuman ang hugot nga siguridad sukad pa ni-anang sayo sa buntag.
“Nalipay kita nga nagmalampuson ug wala’y nahitabo sa pag rally,sa pagprotesta sa atong mga kaigsoonan,” pahayag ni Police Chief Inspector Mardy Hortillosa, tigpamaba sa Cagayan de Oro City Police Office.
Wala’y natalang mga insidente atol sa gipahigayong lihok protesta dili lamang sa dakbayan apan sa tibuok nasud.