LAHI ra gyud ning ubang mga drayber sa jeep diri sa Cagayan de Oro. Lahi ra pud ang ilang pamaagi o diskarte sa dalan. Uban maayo man, apan ang pipila, dunay pagkasipat apan kung buot huna hunaon murag maka gansi sa pasahero o bisag sa ila mismong mga drayber.

Usa sa mga diskarte mao ang pag ali nga dili molarga hangtod dili mapuno. Masabtan (o sabton na lang) kana gumikan kay intawon ang mga drayber kinahanglan mo kuta og lapas pa sa gitakda aron naa pay mauli nga kita sa pag-uli sa ilang mga panimalay.

Apan nakatuon na usab ang mga pasahero nga kung ang usa ka jeep wala pay daghan nga misakay, posible nga dugay usab ang pag ali sa jeep hinungdan nga makadugay usab sa oras sa mga manakayay.

Busa aron dunay manakay og daghan, diskarte karon sa mga drayber nga dunay ipasakay kunohay nga mga pasahero aron ingnon daghan-daghan na ang nanakay apan diay ka konsabo ra nila to sila, ug manganaog gihapon panahon nga medyo puno-puno na ang jeep og mga tinuod nga pasahero.

Ang panghuna sa kasagarang mga drayber sa jeep murag terminal. Dili mo risgo og padagan na lang nga walay pasahero kay mahadlok nga mahurot ang gasolina nga menos ang kita sa pamasahe.

Duna usab nga mga diskarte nga kung buot sumahon mamahimo gyud nga way kapuslanan o pointless, ug gani dili gyud tantong diskarte kay gansi gyud ang maong pamaagi.

Mao kini ang istilo sa ubang drayber nga mo shortcut o mo agi sa ruta nga dili mao aron mapadali kuno ang byahe. Hinuon, maayo kini sa mga gadali apan makasubo kini sa katong mga pasahero nga buot monaog sa destinasyon nga wala gilahos sa tama nga ruta.

Pagtuo sa mga drayber nga daw lumba ang pag pangitag pasahero, apan ila ra pud giilad ilang kaugalingon. Mao ganing dunay ruta ang ilang jeep gumikan kay duna gyuy mga pasahero nga gahulat manakay sa ila, ug kung mo lahi sila’g ruta aron maka ipon sa gasolina, tabla ra gihapon kay mas wala silay makita nga pasaherong manakayay.

Importante ang transportasyon sa modernong katilingban labi na sa mga syudad sama sa Cagayan de Oro. Ang pag-ali ug pag shortcut og ruta usahay mao ang hinungdan nganong nagkayagaw ang sistema trapiko sa kadalanan.

(nefluczon@gmail.com)