SULAYAN sa San Miguel Beermen ug sa Rain or Shine (RoS) Elasto Painters nga iatagak ang ilang kadaiyang kaatbang sa crossover round aron moabante sa semifinals sa 2015 PBA Governor’s Cup.

Parehas kini sila duha nga adunay twice-to-beat advantage diin ang Beermen maatbang sa Meralco Bolts samtang ang Elasto Painters makontra ang Barako Bull Energy Cola.

Apan dili makompyansaan sa Beermen ug Elasto Painters ang ilang mga kaatbang kay nakatilaw kini sila og kapildehan sa elimination round.

Bantayonon ang import sa Bolts nga si Andre Emmit nga nangulo sa iyang 31 puntos, 11 rebounds, lima ka assist ug duha ka steal sa niadtong dula.

Nalimitahan sab sa Bolts ang SMB import nga si Arizona Reid nga nibira lang 13 puntos, samtang si June Mar Fajardo lang ang nangulo sa Beermen nga adunay 22 puntos ug nikuha pa og 16 rebounds.

Ang Barako mao ang usa sa nihatag og kangilad sa sitwasyon sa Elasto Painters pagsugod nila sa conference.

Nadawat sa RoS ang ikaupat nga pilde human nidaog ang Barako, 112-103, niadtong Mayo 31. Gikan dinha, naharos sa Elasto Painters ang nahibilin nga unom nga dula aron angkonon sa ikatulo nga pwesto.

Sa ilang dula, sila Liam Paul McMorrow, RR Garcia ug Joseph Yeo ang nisakwat sa Barako sa ilang kadaogan.

Nangulo si McMorrow nga adunay 32 puntos, samtang sila Garcia ug Yeo nipatak sab og dako sa ilang 26 puntos ug 19 puntos.

Sa RoS niadtong tungora, sila Wendell McKines ug Paul Lee ang nagtimbayayong og maayo sa dula nga nihuman og 41 puntos ug 21, sunod-sunod.