PLANO karon sa pamilya ni Sultan Macasalong Sarip, chieftain sa Kiwalan, nga mopasaka og reklamo batok sa pamunuan sa LaFarge Iligan Inc. (LII) tungod sa paghasi sa ilang pamilya sakop sa nasangpit nga barangay ning Dakbayan sa Iligan.
Mibahad si Sarip nga mo-atubang ang ilang pamilya sa korte aron lamang panalipdan nga magpabilin kanila ang yuta nga ilang nasunod gikan sa ilang mga katiguwangan.
Nagubot ang maong dapit niadtong nakalabay nga adlaw human nga mipadala ang LaFarge og surveyor ug mga trabahante aron motrabaho sa koral sa nasangpit nga planta.
Adunay mga sundalo ug pulis nga mibantay sa mga trabahante tungod sa hulga sa ilang seguridad.
Nadala pa ngadto sa usa ka pribadong tambalanan sa Iligan ang surveyor sa LaFarge human kini mahulog sa lawom nga creek tungod kay gigukod kini og sundang sa usa sa mga anak ni Sarip.
Nanawagan si Sarip nga ipaagi sa hustong proseso sa korte ang maong isyu ug nanghinaut nga dawaton sa matag panig ang desisyon tungod kay andam man sila modawat kung sila ang mapilde.
Wala gi-abog
Giklaro sa pamunoan sa LaFarge nga dili tinuod ang pasangil sa pamilya ni Sarip nga gi-abog sila gikan sa ilang kasamtangan nga gipuy-an.
Kini tungod kay miingon man ang nasangpit nga planta, wala nila gi-angkon ang luna nga naka-titulo sa nasangpit nga pamilya, apan ilang gikuwestiyon ang pagtitulo sa usa ka luna niadto lamang tuig 2000 samtang nalakip kini sa mga yuta sa LaFarge nga tuig 1975 pa titulado na.
Gipasabot sa maong kumpanya nga kumpleto sila sa mga permits gikan sa mga hintungdang ahensiya.
Gipasalig nila nga nangita sila karon og kasulbaran sa maong isyu tali sa mga hintungdan, bisan paman nga nahibuosna sila sa bayolente nga lihok sa pipila ka mga residente sa dapit.