UNSA kahay kamahinungdanon niining petsa nga Septembre 28, 2017 nga niining adlawa man gitakda ang koronasyon sa Binibining Cebu?
Kon mao kiniy hulip sa Miss Cebu nga atol sa Sinulog, logical unta nga Enero sab unta kini ipahigayon.
Ngano man tuod no? Kay di man sila magkasinabot ni Mayor Tomas Osmeña, nangita gyud og lahi nga petsa sila si Presidential Assistant for Visayas Mike Dino ug higalang si Kenneth Cobonpue.
Mao nga nidesisyon sila nga mas nindot ang adlaw nga Septembre 28, 2017. Wa nila giatol bisan kining swerte nga petsa nga Aug. 8.
Di sab tingale kay nag-angat ang Halloween nga kun sa atoa pa, Kalag-kalag. Kangil-ad sab kon mao.
Di kaha kay mao kini ang ika-63 nga birthday ni kanhi mayor Mike Rama? Hinuon, posible nga natayming lang gyud. Sa tantong palayo sa petsa sa coronation night sa naandan nga mao ang semana sa Sinulog, naatol gyud hinuon sa birthday sa kanhi mayor.
Suod gyud tingale kini si Dino ug Rama.
Junjun?
Nagkasinabot na diay ang Team Rama nga si Junjun Osmeña, ang bayaw ni Dino ug manghod ni kanhi Konsehal Ritchie Osmeña ang ilang ituboy isip hulip kang Konsehal Hanz Abella.
Napirmahan na man diay kuno ni UNA chairman Jojo Binay ang endorsement ni Junjun Osmeña alang sa approval ni Presidente Rodrigo R. Duterte.
Kay gipaluyohan man kini ni Dino, adlaw na lang ang ilang gihulat.
Apan yuna pa, akong pangagpas nga mangutana una kini si Pres. Duterte kon si kinsa kini si Junjun gawas nga makatabang sa kandidatura unya pagka mayor ni Dino.
Pananglit, unsa may record niini sa Pagcor? Kumusta iyang family life? Wa ba kini malambigit og gidiling drugas?
Unsa may iyang ma-contribute sa syudad isip konsehal? Magpabadlong ba sab kini sama kaniadto ni Ritchie nga niadto sa Paris ginamit ang calamity funds kay kintahay motambong og summit sa climate change.
Abi nato og unsay nakat-onan, siya na man hinuon ang niduso sa pagtukod og coal-fired plant diha sa Sawang Calero.
Kon buot hunahunaon, appointed ra ba kini siya kon madayon man ug wala pili-a. Mas maayo unta nga i-justify una sa Team Rama nganong kini si Junjun Osmeña ang ilang giduso. O naghinam-hinam lang gyud sila nga makuha pagbalik ang mayorya bahala na kinsay mapuli aron makababag na sa kalamboan sa Syudad sa Sugbo. (@anol_cebu sa Twitter)