GIKAALARMA ni Misamis Oriental Vice Governor Joey Pelaez ang nagkadako nga problema sa ginadili nga druga dili lang dinhi sa dakbayan sa Cagayan de Oro apan sa tibuok nasod sa Pilipinas.

Gibutyag niini nga dako kini nga problema labina aduna nay report nga nalambigit na ang pipila ka mga tinun-an niini.

Buot ni Pelaez ipaabot sa katawhan nga aron kini masumpo, kinihanglan ang hingpit nga koordinasyon sa usag-usa.

Pipila sa mga pamaagi ang pagmonitor sa mga ginikanan sa batasan sa ilang mga anak ug pagobserbar sa mga magtutudlo ug mga tigdumala sa tunghaan labina adunay mga report nga pipila ka mga tinun-an expose na sa ginadili nga druga.

Apil usab ang pag-monitor sa mga opisyal sa barangay kung adubn bay presensya sa mga drug pusher sa dapit ug i-report dayon kini sa ahensya ug kapolisan aron hingpit kining maaksyunan.

Dugang ni Pelaez nga daghan kaayo ug epekto kung malambigit ang usa ka tawo sa ginadili nga druga tungod kay mao kini ang hinungdan sa nagkadaghan nga krimen sa nasod nga angayan sumpuon.