MAAYONG adlaw, mga higala! Gipanugnaw pa ba mo? Nindot gyud kaayo iluko sa katre basta ulan-ulan sa buntag ug gabii. Kung wala lang kitay mga nagkadaiyang obligasyon; segurado ko nga tulog-mantika gyud ta karon. Ayaw kalimti ang payong nga depensa sa kalintura, ubo'g sip-on. Agwantahon ang lapuk nga dalan kay dinala man kini sa panahon nga dili nato mapugngan.
"Dressy" ang tawag kung medyo nasobrahan ang atong mga regular nga sinuotan. Kana ganing "sosyal" o pormal ra kaayo nga dili haum sa lugar o okasyon nga tambungan nato. Imagine nga sa usa ka simpleng bar-b-cue gathering (dili costume party) motambong nga nakapangsimba o naka-gown ta, igsuon. Getch? Lahi pod ng buki o baduy (wala nagkadimaong kombinasyon sa kolor ug desinyo sa sanina).
Sa atong sosyidad duna kitay ginatwag og "dress code." Balaod kini sa komunidad nga personal natong ginasubay bisan wala gina-imposar sa atong gobyerno. Unsa daw kuno? Kana god kita na mismo ang magdesisyon ug maghukom kung ang sanina ba nga atong gisul-ob "acceptable" o haum sa mga tao sa palibot. Duna gyud uniporme ang teachers inig magtudlo sa tulunghaan. Dili pwedeng pang swimming, mare.
Sa mga bossing sa opisina, natural kaayo nga nagasul-ob sila'g barong o any pormal nga sanina. Lisod man kaayo nga nakasul-ob sila'g pambalay unya ang ilang mga alalay kuntodo-postura, diba? Daku kaayo ang kalabutan sa atong sininaan sa pagtagad kanato sa mga tao sa katilingban. Ang istado sa kinabuhi (datu o pobre) dayag pod sa sinul-oban nato'g sanina. Apan daghan pod nga adunahan nga simple kaayo manumit kung itandi sa pipila ka mga bongga nga igu-igo ra pod ang kita.
Sa mga balay pamatigayon, kustombre na gyud nga kutob ra sa gate ang naka-sando, short pants ug tsinilas lang. Pormalidad gamay ang atong hinumduman kung duna kitay transaksyon sa mga opisina aron pasudlon ta sa gwardiya. Klaro ba?
Lastly, ang panamit nato makadani og sundog sa uban labi na kung kita nga nagsul-ob ANGAYAN. Makahagpat pod kita'g mga dili maayong istorya kung makawala'g respeto ang get up (suot), nato. Personally, weird o palahi ko manamit, mare. Ganahan ko mosul-ob sa mga desinyo nga wala dinhi ug didto. Selebrasyon nako kini sa akong pagka-ako bisan dili aprobado sa kadaghanan, migo. Pamati ka ba kaayo ang tinuohan nako?
Tulo ka importanteng rason sa akong pagpili og mga suoton: una, komportable ang tela nga mogakos sa lapad nakong lawas (purya-gaba), miga. Ikaduha, affordable ug lig-on nga sanina aron dili ko sige'g palit (praktikal mode). Finally, sanina nga repleksyon sa akong personalidad nga dala'g ekspresyon sa kiat nakong utok (creative KUNO), igsuon. How about you?