SAMDAN sa iyang dughan ang asawa human pusila sa iyang bana nga iyang nasakpan nga kuyog sa iyang kabit niadtong Biyernes sa gabii sa Barangay Don Virgilio Gonzales, lungsod sa Medellin, amihanang Sugbo.
Pasado alas 8:00 sa gabii dihang gisulong ni Joyce (di tinuod nga ngan), 44, iyang bana nga si Lindo (di tinuod nga ngan), 43, sa maong dapit human niya mahibaw-i nga anaa kini sa iyang kabit.
Kuyog ni Joyce iyang anak nga lalake sa ilang pag-adto sa giabangan nga apartment sa giingong kabit nga si Isay (di tinuod nga ngan).
Matod ni SPO1 Lou Susvilla, desk officer sa Medellin Police, nga nakit-an ni Joyce ang iyang bana nga nag-shirt ug nag-underwear kuyog ang giingon nga kabit niini.
Tungod sa kakurat ni Lindo, nikuha kini sa iyang .22 kalibre nga revolver ug gipusil si Joyce hinungdan nga naigo sa dughan ang asawa.
Pasado ala 1:00 sa kaadlawon kagahapon daling gidala sa iyang anak si Joyce sa Cebu Provincial Hospital sa dakbayan sa Bogo.
Samtang nagpaalim si Joyce sa tambalanan, niadto sa police station ang iyang anak aron mo-report.
Dali nga nihimo og hot pursuit operation ang kapulisan diin nadakpan si Lindo pasado alas 2:00 sa kaadlawon.
Nakuha usab ang iyang armas nga nasayran nga way lisensiya ug serial number.
Pasakaan og kasong attempted murder si Lindo.