BALHOG sa selda sa San Pedro Police Station ang usa ka ulitawo kinsa giingong wa kabayad sa iyang gi-order nga ilimnon alas 2:00 kagahapon sa kaadlawon didto sa Hot Legs sa dalang Palma Gil.

Gipriso mao si Joseph (bansagon gitago), 28, ulitawo, residente sa Barangay Waan, Buhangin District.

Subay sa blotter nga natala ni Police Office (PO) 2 Kian Paul Bargio, duty desk officer sa presinto dos, nasayran nga mipatim-aw ang usa ka Amor Roma Gonzales, 46, manager sa nasampit nga balay kalingawan aron ireklamo ang ilang kustomer.

Giingon nga wa kabayad sa balanse ang suspek nga mokabat sa P3,100 nga kantidad sa ilimnong makahubog.

Dugang nasayran sa Sun.Star Superbalita nga gusto pa sa suspek nga makig-table og Guest Relation Officer (GRO), apan nagdumili ang mga GRO gumikan arogante na kini dihang nahubog.

Dihang pabayaron na ang suspek, wala na kaabot ang iyang kuwarta maong gipapriso nalang siya sa tagdumala sa bar.