NAKATAKDA nga i-kustodiya na sa kapulisan human gisilbi ang warrant of arrest batok sa giingong high-ranking police official kinsa giakusahang maoy nagpapatay sa Cebuano nga negusyanteng si Richard Lim King.

Kini ang gibutyag ni Davao City Police Office (DCPO) spokesperson Police Senior Inspector Milgrace Cajes Driz kagahapon sa hapon sa paghinabi sa Sun.Star SuperBalita pinaagi sa telepono.

Sumala ni Driz nga alas 3:20 kagahapon sa hapon, miabot sa DCPO sa buhatan sa Investigation Detection and Management Branch (IDMB) si kanhi Regional Intelligence Unit-Davao head, Police Superintendent Leonardo Felonia.

Giingon ni Driz nga giproseso kagahapon ang pag-mug shot kang Felonia, ug gihatod sa ospital alang sa medical, dayon gihatod sa korte aron i-proseso ang giingong pagkadelatar sa Mayo 29, 2015 nga order ni Felonia nga diha siya magpa-detain sa DCPO labot sa iyang seguridad luyo sa mga hulga nga iyang nadawat.

"Alas 3:20 miabot siya diri sa DCPO, dayon gi-proseso ang iyang pag-book, mug shot, human gipa-medical ug gideretso sa court, but then wa pa gyud ta nasayod asa siya i-detain diri ba sa DCPO o didto sa City Jail, hinuon mag-depende na sa court," ingon ni Driz sa SuperBalita.

Gidugang sa opisyal nga wala silay ipatuman nga special treatment kang Felonia bisan og kanhi kini opisyal sa Philippine National Police (PNP).

"Kung unsa lang pod atong task as enforcer, i-implement lang gyud nato kung unsay tama. Then with regards sa security, hatagan sab nato og seguridad. Kay dati man siyang opisyal sa PNP, atoa gyud siyang i-settle down, i-agi sa gyud nato sa proseso, same sa uban ang proseso nga gina-serve-ban og warrant," sumpay sa pahayag ni Driz.

Samtang gisulti sab ni DCPO Director Vicente D. Danao Jr. nga ila gyud nga isilbi ang warrant of arrest ug walay mahitabong personalan sa ilang trabaho.

"Nag-serve lamang po tayo ng warrant of arrest; wala ng iba pa. Itong ginawa natin, wala itong personalan, trabaho lamang," tipik sa pamahayag ni Danao nga nahinabi sa mga tigbalita.

Kahinumdoman nga si Regional Trial Court Branch 16 Judge Emmanuel Carpio nagpagula og kamandoan nga ipagawas ang warrant of arrest batok kang Felonia.

Sa iyang order pinetsahan Pebrero 3, 2015, si Carpio nagmando sa pagpagula sa warrant of arrest batok kang Felonia human mapakita ang pipila ka mga ebidensya sa kaso.

"On the documents presented by accused Felonia such as report on the forensic examination dated July 4, 2014, Soco report dated June 26, 2014, exchange of text messages and memorandum report from the PNP crime lab, the court finds them to have no bearing in the resolving the probable participation of accused Felonia as the one who ordered the killing victim Richard L. King," unod sa order nga una nang namantala sa SuperBalita.

Sa pagpangita sa igong hinungdan, si Carpio nagsulti nga ang extrajudicial confessions sa miangkon nga mipatay nga sila Paul Dave Molina Labang ug managsuong Rommel ug Rodel dela Cerna mga "confirmatory with each other to show the probability that accused Felonia participated as the principal by inducement in the commission of the offense."

Ang huwes nagsulti usab nga ang pag-angkon sa mga suspek legal, sukwahi sa katarungan ni Felonia.

Nakita sab ni Carpio nga ang tulo ka giakusahan nga suspek mao ang regular nga kustomer ni Felonia sa Laud Firing Range sa Ma-a, siyudad sa Davao, diin si Labang ug magsuong dela Cerna nagtrabaho.

Samtang si Carpio magmando nga ipaguwa ang warrant of arrest niadto, giingong wala pa masulbad ang motion alang sa pagpaguwa og hold departure order sanglit ang City Prosecutor's Office nagkuwang pa sa datus alang sa aplikasyon ni Felonia sa maong mga takna.

Ang iyang legal counsel, Caesar Europa, nag-ingon nga ila nang nasabutan sa iyang kliyente ang mga remedyo nga ilang himuon labot sa kaso niini nga murder.