USA ka barangay kapitan sa Aliguay ug duha ka personahe sa Philippine Coast Guard (PCG) ang gidagit sa bandidong grupong Abu Sayyaf didto sa Aliguay Island sa Dapitan niadtong Mayo 4.

Ang usa kanila giilang si Gringo Villaruz, migradwar sa University of Mindanao, sakop sa PCG, ug taga Sasa, Davao City.

Laing sakop sa PCG giilang si Rod Pagaling samtang ang nadagit nga kapitan mao Rodolfo Boligao.

Niadtong Miyerkules sa buntag, usa ka 4-minutos nga video ang gi-upload sa Facebook, nagpakita nga tulo ka mga lalaki ang gitaptapan ang mata samtang nagluhod nga kontrolado sa walo ka mga armado nga nakamaskara, gidudahang sakop sa Abu Sayyaf.

Ang tulo nangayo og tabang kang Pangulong Benigno Aquino III.

Si Villaruz nagsulti sa video: "Ngayo mi og tabang sa kataas-taasang gobyerno, kay President Aquino ug uban pang opisyales. Tulungan niyo po kami."

Si Villaruz, kinsa migraduwar sa Electrical Technology program sa University of Mindanao (UM) niadtong 2006, midugang: "Pugutan nila kami ng ulo kung hindi maibibigay yung gusto nila. Tulungan niyo kami."

Samtang ang laing duha nga gidagit nangayo sab og tabang sa gobyerno.

Si Boligao nagsulti: "Ngayo pod ko og tabang kay Mayor Jaloslos ug kay Presidente Aquino."

Mga sakop sa Abu Sayyaf nangayo og ransom money nga P1 million ang matag usa kanila.

Si Eva Fatima Villacruz-Abarquez, iyaan ni Gringo Villaruz, nagsulti sa Sun.Star sa pakighinabi nga nangayo sila og tabang sa PCG aron luwason ang tulo.

"Sige mi'g balik-balik sa headquarters sa PCG diri sa Davao pero wala man silay gihatag pa na update," sulti ni Abarquez.

"Kadtong akong pag-umangkon, ma-assign to siya kauban ang isa pa ka coast guard didto sa isa ka isla or resort didto sa Dapitan. Pero ang akoa pwede ba diay na bulag-bulag sila i-assign?" dugang niya.

Ang inahan ni Villaruz wa pa nasayud sa pagkadagit sa iyang anak.

Si Abarquez nagsulti nga nangayo sab siya og tabang kang Davao City Mayor Rodrigo Duterte, Department of Interior and Local Government Secretary Mar Roxas, ug President Aquino.

Si PCG-Davao district commander commodore Joselito Dela Cruz, sa pakighinabai kaniya, nagsulti nga naghimo na sila og kaugalingon nga paagi alang sa pagbuhi sa mga gidagit.

"Meron ng mga negosasyon pero hindi na inilalabas sa media," sulti ni Dela Cruz.