NIADTONG Septiyembre 21, gideklarar sa Malacanang nga “National Day of Protest” pagtugot sa bisan unsang grupo pagpadayag sa ilang sentimento, mangil-ad o dalaygon man, ngadto sa gobiyerno.
Siyempre, ang walhon nga grupo kanunay mipadayag sa ilang pagsupak sa pamunoan. Unya, gibanhaw sab nila ang pagkondenir sa rehimen ni kanhi presidenti Ferdinand Marcos sa maong adlaw nga gideklarar niini ang Martial Law sa nasod niadtong 1972.
Sa pikas nga bahin, ang Liberal Party nga gipangulohan ni kanhi Presidente Noynoy Aquino III nigawas usab aron pagpadayag sa ilang protesta.
Unsa man gyud ang ilang gi-protestahan? Ang presidenti mismo, ang iyang pagkatawo, kinaiya ug pamatasan, o ang sistema sa panggobiyerno ug mga polisiya sa administrasiyon karon?
Daghan ang miduyog sa maong protesta, ug nakaseguro ta nga dili tanan kanila nahibaw sa ilang gisalmotan.
Ang uban mipadayag sa ilang mga baruganan diha sa social media.
Nagkadaiyang opinyon, pabor o supak sa administrasiyon ni Duterte ang mibaha sa media.
Apan, wa pa gyud matino, ug kinahanglan pang determinahon mao kining particular nga butang o polisiya nga wala nila mahimut-i.
Unsa man gyud? Nagprotesta ta tungod kay wala kita matagbaw sa panirbesyo sa gobiyerno ug nagpadayon gihapon ang daghang kahiwian?
O niduyog ta sa mga protesta kay lagi kaalyado nato sa partido ang nagpasiugda?
Mao ni ang maot nga kamatuoran karon. Tataw man gyud nga daghan kanato gipasuwabi ang “pagbati” diha sa paghusga sa gobiyerno ug wala nato gipasubay ang atong pagsusi sa kalihukan sa administrasiyon basi sa atong “pagtuo.”
Kon nuntan kanunay nato ang atong “feeling” o pagbati, mahimo tang emotional kanunay bisan sa gamay nga butang ug dili na nato matutukan ang tiunay nga punto.
Busa, kanunay ta maagni sa mga tam-is nga mensahe, panultihon ug mga saad. Ug mao na ang gigamit sa mga politiko aron pagbitik sa mga tawo.
Ambot kanus-a mausab kining pagsud-ong nato sa namunoan sa gobiyerno. Kon kanunay isandig diha sa atong pagbati, lupig pay artista nato sa pelikula.
Kon lamang atong gipasikag sa atong “pagtuo” ang pag-aninaw sa administrasiyon o gobiyerno karon, mahimong lahi ra kaayo atong paghangop sa kamatuoran.
Si Presidente Rodrigo Duterte dunay lig-on ug klaro nga ebidensiya sa kaepektibo sa iyang pamunoan dihang gipalambo niya pag-ayo ang dakbayan sa Davao panahon sa iyang pagka-mayor.
Kon duna tay dakong “pagtuo” diha sa iyang pamunoan, nan, segurado nga mas hingpit pa atong pagsuporta niya.
Dad-on sa atong “pagtuo” ug dili “pagbati” ang kasegurohan nga himoun sab niyang malambuon ang Pilipinas sama sa iyang gibuhat sa Davao City.