MOABOT sa 58 ka pamilya kon 130 ka mga indibidwal ang sobrang naapektuhan sa natala sa lungsod sa Kalilangan, Bukidnon human sila maoy sentro sa 5.4 magnitude nga linog niadtong Dominggo sa kadlawon, Septembre 24.
Sa update nga gipagawas sa Local Disaster Risk Reduction Management Council sa Kalilangan ang maong 58 ka pamilya ang maoy naguba gyod og maayo ug dili na mapuslan ang ilang mga puloy-anan gumikan sa kusog nga linog ug anaa na lamang sila karon gawas sa ilang puloy-anan nga nag-tent.
Aduna sab mga naapektuhan nga populasyon sa dapit nga moabot og 154 ka pamilya ingon man 614 ka mga indibidwal. Adunay apektado sab nga laing 227 ka pamilya kon 559 ka mga indibidwal diin ilang mga puloy-anan ang severely damaged ug partially damaged.
Sa maong linod moabot sa 10 ka mga tao ang nasamdan sama sa nahulogan ug mga gamit ug natumbahan.
Natala usab ang pagka-damage sa mga infrastruktura sa gobyerno sama sa skwelahan, simbahan, tulay ug namatikdan ang landslide sa nagkadaiyang lugar.
Ang lungsod sa Pangantucan nga lakip sa nakasinati og kusog nga linog aduna sab natala nga apektado.
Sa Sitio Bacolod, Barangay Kipaducan, ang adunay na-damage nga panimalay nga duha ka bouk diin dunay siyam ka indibidwal nga apektado.
Si Office of the Civil Defense-Northern Mindanao Regional Director Liza Mazo namahayag nga ang tanan nga mga opisyal sa mga apektadong lugar sa Bukidnon ug Lanao del Sur ang nagbutang dayon og incident command post aron motubag sa mga apektadong residente.
Kahinumdumang mitay-og ang linog niadtong kadlawon sa Domingo diin ang epicenter sa Kalilangan, Bukidnon ug Wao, Lanao del Sur.
Nabati usab ang pagtay-og sa mga kasikbit nga lugar diin
Intensity 6 ang Kalilangan Bukidnon, Intensity 5 dinhi sa dakbayan sa Cagayan de Oro, Intensity 4 sa Kadingilan, Pangantucan, Maramag, Damulag ug Don Carlos, Quezon siyudad sa Valencia ug Malaybalay Bukidnon.
Nasinati sab ang Intensity 3 sa North Cotabato, lungsod sa Talakag, Bukidnon; Misamis Oriental ug Intensity 2 sa dakbayan sa Kidapawan.