GISUSI karon sa Senado ang kamatayon ni Horacio Castillo III, usa ka estudyante sa abogasiya sa University of Santo Tomas sa kaulohan, nga giingong namatay tungod sa hazing sa usa ka fraternity.
Mao nga angay natong balikan paghisgot ang 22-anyos na nga balaod, ang Republic Act No. 8049, ang Anti-Hazing Law.
Nganong duna pa may nangamatay gumikan sa hazing bisan pa sa maong balaod? Ang maong balaod igo lang nga nag-regulate sa hazing. Apan wa ni idili sa hingpit ang hazing.
Gipasar sa House justice subcommittee on prosecutorial reforms ang House Bill No. 3467 nga hingpit nga magdili sa hazing sa mga fraternities, sororities ug mga community organizations sud sa mga eskuylahan ug mga komunidad.
Ang maong balaudnon nagbahig sa hazing ug sa initiation rites. Sa ato pa, mahimo nga adunay initiation rites sa pagsulod nimo sa usa ka organisasyon, apan gidili sa hingpit ang hazing.
Gidili sa hingpit ang bisan unsang physical ug psychological injuries sa mga initiation rites. Ang mga fraternities ug mga sororities kinahanglan nga magparehistro sa ilang eskuylahan o kaha local government unit.
Ang matag fraternity ug sorority kinahanglan nga adunay faculty adviser nga mag-monitor sa ilang mga aktibidad o mga kalihukan sa sud ug gawas sa eskuylahan.
Ubos sa maong balaudnon, ang pag-uyon sa biktima sa hazing o ang iyang pagpirma og waiver kon dunay mahitabo atol sa hazing di mahimong gamiton nga depensa niadtong nihimo sa hazing.
Apan ang maong balaudnon moagi pa sa House justice committe usa pa kini debatehan sa plenary kon sa kunatibuk-an sa House of Representatives aron aprobahan ug ang Senado mopasar pa og susamang balaudnon una pa kini mahimong balaod.
(edbarrita@gmail.com)