NAGHIMO og structural evaluation ang Mactan Electric Company (Meco) sa Mactan-Mandaue Bridge subay sa gisugyot niini nga solar power system sa dapit.
Si Engr. Gilbert Pagobo, general manager sa Meco, nibutyag nga nagpaabot sila sa pagtugot gikan sa Department of Public Works and Highways aron mopresentar sa ilang gihimo nga pagtuon sa kalig-on sa unang taytayan gikan sa ilang gi-hire nga structural engineer.
“Para ma-present namo nga structurally dili siya damaging,” niingon si Pagobo sa Superbalita Cebu kagahapon.
Ang Meco nipresentar na sa gitanyag nga proyekto atol sa tigom sa Mactan-Cebu Bridge Management Board niadtong Agusto sa miaging tuig.
Apan pipila ka mga opisyal sa bridge board niawhag sa Meco nga moagi una sa DPWH aron masusi kon makasugakod ba ang taytayan kon butangan og solar panels.
Kon maaprobahan sa DPWH central office ang proyekto, matod niya, magbutang sila og dul-an 1,400 ka solar panels nga dunay matag panel may gibug-aton nga 15 kilos.
Matag panel mosukod og 1.2 metros by 1.5 metros ug kini may kinatibuk-an nga gibug-aton nga susama sa tulo ka pasaheroan nga mga jeepney.
Ang proyekto magkantidad og P30 milyones.
Suma pa ni Pagobo ang panels nga ibutang sa Meco sa kinaibabwan nga bahin sa unang taytayan, dunay kinatibuk-an nga kapasidad nga 350 kilowatts diin matag usa maka-produce og 250 watts.
Siya nidugang nga sa higayon maaprobahan sa DPWH ang ilang sugyot, masugdan nila kini human sa usa ka buwan ug tinguha nila nga mahuman kini sa dili pa matapos ang 2017.
Human sa unang taytayan, isunod nila ang Marcelo Fernan Bridge.Sa kasamtangan, normal ang supply sa kuryente nga nakuha sa Meco alang sa dul-an 90,000 ka mga balay sa dakbayan sa Lapu-Lapu ug lungsod sa Cordova.