LAMI, barato ug maabiabihon ang mga rason nganong gibalikbalikan sa mga kustomer ang The Village Restaurant and Grill sa dan A.S. Fortuna, dakbayan sa Mandaue.
Dili pa lang dugay, dunay bag-ong gidalit ang restaurant, ang cheesy beef salpicao ug ang deep-fried ice cream nga may tulo ka flavors: chocolate, strawberry ug vanilla.
Si Winfiel Przewodnik, chef ug usa sa mga anak sa tag-iya sa The Village, nipaambit nga masurprisa ka sa kalami sa deep-fried ice cream nga init sa gawas ug bugnaw sa sud nga usa sa ilang mga pambato.
Ang nakalahi sa restaurant sa uban kay ang mga pagkaon may templa nga fusion sa European ug Pinoy style nga gipasiugdahan sa ilang amahan nga si chef Martin Przewodnik, usa ka German national.
Bisan kon mahalon ug classy kon tan-awon ang sud ug gawas sa The Village, apan barato ang presyo niini nga magsugod sa P250 hangtod sa P700, depende sa imong i-order.
Si Mark Przewodnik, laing anak sa tag-iya, niingon nga duna silay 15 ka main courses ug 10 ngadto sa 15 ka side dishes sama sa BBQ back ribs, lechon kawali, inihaw nga manok, sisig, chicken finger, calamares, chicken wings ug uban pa.
Paborito usab i-order sa ilang mga customer ang beef and pork grill sa kantidad nga P645 ug ang seafood with vegetables grill nga tag P745 ang matag order.
Samtang, halinunon usab ang ilang The Village cocktail ug The Village coffee cocktail.
Matod ni Mark giseguro nila malamian ang ilang mga customer sa mga pagkaon nga ilang giandam nga dili mahalan sa presyo.
“We want the food to be good at the same time kanang dili mabuslot ang ilang bulsa,” matod niya.
Ang restaurant kay usa ka kanhi balay nga gi-convert ngadto sa pagka restaurant nga kanhi naila nga La’mas Creative Filipino and Western Cuisine.
Ang kahanas sa pagluto sa ilang amahan nga nakat-unan sa mga anak kay namana sa naunang mga henerasyon sa ilang pamilya labi na sa ilang apohan nga babaye.
Gawas nga mabusog, malingaw usab ka og tan-aw sa mga hulagway nga gipapilit sa bungbong sa restaurant nga mga hilig ni Chef Martin. Ug samtang ikaw mabusog, libre ka makaduwa og billiard, dart, ug shuffle board.
Aduna usab live bands matag Huwebes, Biyernes ug Sabado nga magsugod alas 10 sa gabii hangtod alas 2 sa kaadlawon, gawas lang sa Biyernes, alas 9 sa gabii hangtod alas 12 sa tungang gabii.
Modawat usab sila og reservation alang sa mga customer nga gusto ma-exclusive ang restaurant diin masud ang 40 ka tawo.