Mongaya: Nagpadala sa tama

NAUKAY ang Sugbo niining 76-anyos nga si Leo Zafra kinsa nipatay kang May Azalia Albasin, 33, tungod sa selos. Lalim bay 41 ka tuig ang gintang sa ilang edad apan nagkauyab sila hangtod nga niabot sa maduguon nga hitabo sa miaging semana.

Tinuod, daghan ang nangangha sa sitwasyon. Nagpadala sa selos ang tiguwang dihang gusto na makigbuwag ang babaye kaniya.

Basi sa mga feedback sa mga listener sa mga programa sa radio nga atong namonitor, daghan ang dili makatuo nga mahigugma pa ang babaye sa usa ka 76 anyos nga lalaki. Kwarta lang gyud tingale ang hinungdan nganong nisugot siya nga mahimong sila.

Apan sa laing bahin, bisan pa man og dali nang makapalit karon og Viagra o mga alternatibo niini, makapanukod pa diay kining mokapin na sa 70 anyos? Malukot na gani ang bag-o lang na senior citizen.

Sa ingon niana nga relasyon, nganong di man mosugot ang tiguwang nga malipay sa laing lalaki ang iyang uyab kon tinuod nga gugma man gyud kaha ang iyang gibati.

Lahi na hinuon kon kwarta lang ang gibasehan sa maong relasyon nga posible gyud nga makaingon ang tiguwang nga sayang ang iyang kwarta nga igo na lang gisalikway. Paet.

Bisan pa man, ma-gugma man o kwarta ang hinungdan sa maong relasyon, di gyud angay magpadala sa tama aron di mahimong criminal.

Bag-o lang tong insidente didto sa kaulohan dihang nag-amok ang usa ka lalaki kay nagtuo siyang nagluib kaniya ang iyang uyab. Matod pa, mao na gani kini ang iyang gipili ug gibiyaan ang pamilya, mobalhin na hinuon kini sa laing lalaki.

Ibalik lang nako pagsulti nga sayop gyud nga magpadala sa emosyon sa ingon niini nga sitwasyon.

Basi sa mga impormasyon nga gipanghisgutan sa pipila ka brodkaster, maayo baya ang negusyo niining Zafra. Iya lang gyud nga gilawgaw ang tanan.

Konsehal

Basta kining isyu kabahin ni Leo Zafra, lahi ni sa isyu diha sa Konseho sa Syudad sa Sugbo diin giangkon ni Mayor Tomas Osmeña ang iyang tinguha nga mailisdan si Konsehal Philip Zafra ug mabakante ang pwesto.

Naintriga lang ko niini kay naa na ba diay kumpyansa si Mayor Osmeña nga makadaog og eleksyon sa Association of Barangay Councils (ABC) ang iyang kandidato?

Sa akong nabal-an man gud, mayoriya ang mga kapitan sa oposisyon.

Hinuon, posible sab gyud nga duna nay namalitok labi na nga kining mga wa malambigit sa gidiling drugas. Mahadlok nga maratsada sa mga kontrobersiyal nga mga kapitan labi na kining naa sa gitawag og PDEA – Pasil, Duljo, Ermita ug A. Lopez.

Sa laing bahin, wa pa masiguro ang appointment ni Junjun Osmeña isip konsehal nga hulip kang Hanz Abella.

Atong nasayran nga duna sab diay laing nominee nga giduso ni Sen. Manny Pacquiao nga mao si kanhi federation president sa Sanggiang Kabataan nga mao si Rengelle Palayo. Hmmm.

(@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph