GIPAPIRMA sa Oklahoma City Thunder og labing mahal nga kontrata si Russell Westbrook aron magpabilin kini sa ilang balwarte.
Sa taho sa ESPN, mipirma si Westbrook og contract extension nga nagbalor og $205 million nga molanat og lima ka mga tuig.
Si Westbrook nag-post sa Instagram kagahapon sa iyang hulagway nga nagsiyagit sa Chesapeake Energy Arena nga nag-isa sa iyang duha ka mga kamot.
Ning bag-uhay lang, gipabuhagay ni Westbrook nga sa Oklahoma City lang siya gustong moduwa.
Matod niya nga nagpanikad siya nga mokombati sa umaabot nga season sa National Basketball Association (NBA) aron ikauban ang bag-ong mga pambato sa Thunder nga sila si Carmelo Anthony ug Paul George, sama ni Westbrook, pulos All-Stars.
Nakuha sa Thunder si Anthony gikan sa New York Knicks ning bag-uhay lang samtang si George ilang nabira gikan sa Indiana Pacers niadtong summer.
“I love being here,” batbat ni Westbrook. “I’m excited about the season. Obviously, with a lot of new changes, and I’m excited.”
Ang tag-iya sa Thunder nga si Clay Bennett mipabuhagay kon unsa ka importante ni Westbrook sa ilang puwersa sa gawas ug sulod sa korte.
“We recognize and deeply appreciate Russell’s rare and unique abilities as he leads the Oklahoma City Thunder, but also understand his presence and impact on our community will be felt for decades to come,” batbat ni Bennett.
Si Westbrook nag-average og triple-double sa miaging season ug siya maoy scoring champion sa liga. Nag-average siya pg 31.6 puntos, 10.7 rebounds ug 10.4 assists.
Nakamugna si Westbrook og triple-doubles sa miaging season sulod sa 42 ka mga higayon aron buakon ang dugay na nga rekord ni Oscar Robertson.
Sa sayo pa, ang mga sumosunod sa Thunder nabalaka sa posibilidad nga mobiya sab si Westbrook sama sa gibuhat ni Kevin Durant.
Gipasabot ni Westbrook nga wala dayon siya mipirma sa kontrata gumikan sa obligasyon sa iyang pamilya nga kinahanglan niyang tumanon. (AP, ESL)