GIKOMPIRMAR sa hepe sa Talisay Police Station, Supt. Jason Villamater nga ang suspek sa pagpatay sa anak sa kanhi reporter nga si Jessie Largo na-acquitted sa iyang kasong robbery with homicide sa usa ka tinun-an sa nursing niadtong 2009.
Una niini si Largo nasilotan og pagkabilanggo sa tibuok kinabuhi nga walay piyansa ug gidala na kini sa Leyte Regional Prison niadtong 2015.
Apan karong bag-o, gibutyag ni Villamater nga nakadawat silag kopya sa release paper gikan sa Leyte Regional Prison, ni Largo human mipabor kanila ang ilang giapelar ngadto sa korte.
Matod ni Villamater ang acquittal order ni Largo gipetsahan niadtong Disyembre 20, 2016.
Gibutyag ni Villamater nga lakip sa nakalingkawas sa kaso mao ang mga kauban ni Largo sa pagpatay ni Dennis Kristoffer Bago niadtong 2009.
Si Villamater natingala nga dali lang nakagawas ang mga akusado.
Karong bag-o, si Largo gipasanginlan na usab nga nipatay sa 21-anyos nga si John Ronli Calizar, anak sa kanhi reporter ug karon anaa na sa Philippine Information Agency nga si Ferliza Contratista.
Si Villamater dili pa makasiguro kon nakabiya na ba si Largo sa Talisay. (DRT)