Tunghaan gibasol sa ginikanan sa paghikog

NIPADAYAG og pagmahay ngadto sa mga opi­syal sa tunghaan ang mga ginikanan sa babaye nga estudyante nga naghikog pinaagi sa pag-am­bak gikan sa pan­sa­yan sa 7th floor niadtong Hu­webes sa hapon.

Alang kanila, angay untang gihugtan pagbantay sa tunghaan si Jonah Villarin ug kon dunay nabantayan nga suliran sa panghuna-huna, giindusar unta ngadto sa doktor sa tagdumala sa tunghaan.

Mao kini ang gipadayag ni Charmaine Villarin, inahan ni Jonah, sa interbyu sa Superbalita Cebu.

Matod ni Charmaine nga gipaadto siya sa mga opisyal sa tunghaan sa wa pa mahitabo ang paghikog, apan wa siya tugoti sa guidance councilor nga si Marcos Agona nga makakita sa iyang anak, kinsa wa mouli og usa ka adlaw sa ilang balay.

Si Charmaine niingon nga sa iyang pag-abot, didto sa sulod sa guidance councilor’s office, ang iyang anak ug siya gipalingkod lang sa gawas.

Niduol kaniya si Agona ug giingon nga gipahibawo siya nga di na masabot ang panghunahuna sa ilang anak.

“Nganong wa man nila bantayi og maayo paingon didto sa CR? Nganong wa man nila i-indusar og psychiatrist ang akong anak ug dili diay nila makaya? Nganong wa man nila dad-a na lang daan sa ground floor? Nga mi-attenpt na man kaha to og layat sa school?,” matod ni Charmaine.

Kusganon nga gipanghimakak sa inahan nga nisuway og hikog sa ilang balay ang iyang anak.

Gihulagway niya nga ‘jolly’ pagkabata si Jonah, aktibo sa kalihukan sa tunghaan ug wa gani sila makamatikod nga may problema.

“Wala mi problema sa pamil­ya. Maayo ang among relasyon sa akong bana. Wa gani na sila makakita nga nag-away mi. Dili sad namo batasan nga mana­pat sa anak bisan kusi, “matod ni Charmaine.

Giangkon sa inahan nga may nauyab ang iyang anak sukad pa niadtong Hunyo.

Mao kini ang nakauban sa iyang anak niadtong Huwebes ug wa na makontak pa hangtod sa pagka hitabo.

Gitataw ni Charmaine nga dili mabdos ang ilang anak kay na­ngayo pa kini og napkin sa iyang iyaan niadtong Dominggo.

Samtang gipadayag sa inahan nga nasakitan sila sa nanggawas nga taho kabahin sa mga pasangil batok nila.

Apan ila na kining gidawat ug gipasaylo ang ilang anak kon unsa may gisulti niini ngadto sa iyang mga magtutudlo.