UWAHI nga bonding na diay kadto sa mag-apohan human nakabsan sa kinabuhi ang 11-anyos nga lalake, nga nalubong sa pagdahili sa yuta sa Purok 3, Barangay San Jose, dakbayan sa Sugbo, niadtong Biyernes sa gabii.
Matod ni Nagiel Bañacia, pangu sa Cebu City Disaster Risk Reduction and Management Office (CCDRRMO), nagtan-aw og TV ang grade 5 student nga si Kyle Ashley Barcoso inubanan sa lolo niini nga si Juanito Barcoso, 62.
Dugang ni Bañacia nga alas 8:45 sa gabii nahitabo ang pagluwas sa mga biktima human nidahili ang ibabaw nga bahin sa nahimutangan sa ilang balay hinungdan nga ang yuta nitabon sa balay.
Daling ningresponde ang mga rescue personnel sa Siyudad ug giguba ang balay sa mga Barcoso aron makuha ang mga biktima sa sulod.
Nadala pa sa tambalanan si Kyle apan gideklarar kini nga dead-on-arrival.
Si Juanito nakaangkon og samad sa iyang tuo nga paa samtang ang asawa niini nga si Concordia, 61, nadala usab sa tambalanan tungod sa pagsaka sa blood pressure human sa hitabo.
Kagahapon sa buntag nakadawat usab ang Cebu City Central Command og taho sa pagdahili sa yuta sa Sitio Diya, Brgy. Pulangbato, paingon sa Sitio Langub, Brgy. Sirao.
Gipadalhan dayon nila og heavy equipment ang dapit tungod kay nakabara sa dalan ang maong yuta.
Samtang, kabahin sa baha sa dakbayan sa Sugbo niadtong Biyernes sa buntag, tulo na ang nangamatay, diin duha niini ang managsuong menor.
Nakit-an sa bahin sa South Road Properties (SRP) exit sa Kinalumsan river ang 9-anyos nga si Juros Taran.
Si Juros nakit-an sa usa ka mananagat nga galutaw ug wala na’y kinabuhi.
Lakip sa patay sila si John Carlo Taran, 8, manghod ni Juros, ug si Arturo Cabradilla, 26.
Sila naanod sa baha human nalusno ang footbridge sa Sitio Riverside, Brgy. Guadalupe, dakbayan sa Sugbo.