SULOD sa 16 ka mga katuigan nga akong pagministeryo, ang common nga pangutana sa kadaghanang mga Kristiyano mao kini - unsa gayud ang tinuod nga relihiyon?
Ang relihiyon, mga higala, usa ka sistema sa pagtuluohan nga naay kalabutan sa kaluwasan. Kung kining pagtulun-an ang atong basehan, aduna lamang pito ka mga relihiyon sa tibuok kalibutan.
Kini sila mao ang Kristiyanismo, Islam, Hinduism, Buddhism, Taoism, Shintoism, Ancestral Worship o folk religion. Tawgon ka nga usa ka Kristiyano kung nagatuo ka sa Diyos ug ni Ginoong Jesus nga imong Manluluwas. Islam ang imong relihiyon kung ikaw nagatuo ni Allah ug ni Mohammad nga Iyang propeta. Matag-relihiyon adunay nagkadaiyang pagtulun-an kalabutan sa kaluwasan sa ilang katawhan.
Unya, unsa may tawag aning mga pundok sulod sa relihiyon nga Kristiyanismo sama sa Roman Catholics, Evangelicals, Adventists, Baptists, Pentecostals, Iglesia ni Kristo, Jehovah's Witnesses, Church of God ug uban pa?
Mao kini ang mga pundok o sekta sa relihiyon nga Kristiyanismo, mga higala. Busa, kung pangutan-on ka kung unsa ang imong relihiyon, Kristiyanismo ang imong i-ingon. Ayha ka pa mosulti sa imong pundok o sekta kung pundok na o sekta ang pangutana.
Karong ato nang nasuheto ang terminolohiya sa pulong relihiyon, unsa ba gayud ang tinuod nga relihiyon?
Natural, mosulti gayud kita nga Kristiyanismo ang tinuod nga relihiyon. Kay sa tinuod nga pagtuon, basehan nato ang history ug propesiya, wala pay mas labaw pa sa atong Balaang Bibliya. Ug sa pagtulun-an sa pamatasan, wala nay makalabaw pa sa pagtulun-an sa Bibliya. Busa, Kristiyanismo ang tinuod nga relihiyon.
Apan sa kadaghang mga pundok o sekta niining relihiyon, asa ba gayud ani nila ang tinuod nga Kristiyanismo?
Adunay mga Kristiyano nga nagabantay sa sugo, aduna poy mga Kristiyano nga nagapanghiwala niini. Adunay mga Kristiyano nga nagabantay og Sabado, kadaghanan Dominggo, ug ang uban walay adlaw'ng klaro.
Ang uban pilian og pagkaon, ang uban bisa'g unsa kaunon. Ang ubang pundok puti ug taas ang mga sinina, samtang ang uban mora na'g walay sinina.
Unya, asa man ani nila ang tinuod nga Kristiyanismo?
Matud pa ni Santiago sa iyang sinulatan (1: 27): "Ang putli ug tinuod nga relihiyon ngadto sa Diyos ug sa Amahan mao kini: ang pagbisita sa mga ilo ug mga balo sa ilang kalisud, ug sa pagbantay sa kaugalingon nga dili mahugawan sa kalibutan."
Kining teksto nagasulti nga ang tinuod nga relihiyon makita sa buhat ug dili lamang sa pulong. Kadaghanan sa mga Kristiyano karon magsige og lantugi sa ilang mga pagtulun-an.
Apan kung ang Bibliya maoy himuong basehan, ang paghigugma ngadto sa uban ilabi na gayud sa mga nagakinahanglan mao ang timailhan.
Dinhing dapita nagapakita og sinserong pangserbisyo ang inyong mga higala.
Sa Camus St., Davao City, inyong makita ang inyong mga higalang Adventista sa Filipino-Chinese Seventh Day Adventist Church nga nagapanghatag og libreng arroz caldo matag-Sabado.
Apil niini ang wheat bread ug cinnamon bread alas 7 hangutd alas 8 sa buntag. Hinaut nga atong matagamtaman ang pagkatinuod sa ilang relihiyon sa ilang panerbisyo.