MALIPAYONG pagsaulog sa kapistahan sa may patron nga sila si San Miguel, San Rafael, San Gabriel ug uban pang arkangel.
Dili gyud nako mapakyas nga masulat dinhi sa Nota bene ang kabahin kanila tungod kay si San Miguel ang patron sa among gamay nga parokya sa Padada, Davao del Sur. Gisulayan ko untang motambong sa salo-salo didto sa among Heritage House niadtong Septembre 29 apan dunay kabilinggan ug nibundak ang kusog nga ulan busa wa na ko madayon.
Sayang ang giandam nga inasal nga baka, baboy, manok, kilawin ug kaldereta nga kanding, sinugba ug kinilaw nga bariles ug uban pa. Way labot ang pinakbet, papait ug law-oy nga may dahon sa kalamunggay nga sekreto sa among inahan sa iyang hataas nga kinabuhi.
Niabot gikan sa Glendale Heights, Illinois, sa Amerika ang among inahan nga si Crispina Campasas, biyuda de Roldan nga mag-93 anyos na karong Nobyembre.
Giubanan siya sa akong manghod nga si Anabelle "Dayleen" Tumlos nga nanimuyo didto sulod sa sobra 20 anyos.
Sa 11 namo nga magsuon, ako ra ug ang akong igsuon nga si Alex sa Department of Interior and Local Government ang wala didto. May gihambin nga balatian ang iyang asawa nga si Vangie busa wala sila makatambong. Niabot usab ang among mga "big brothers" nga gikan sa kaulohan. Sila si Dr. Tony ug kabuo nga si Cecille, si Willy nga executive director na karon sa Fertilizers and Pesticides Authority ug si Dodong Manuel ug iyang kabuo nga si Arlene, sa Department of Labor sa Tuguegarao.
Siyempre anaa kanunay ang Davao iron ladies nga sila si Ate Juliet, Nenen, Helen ug Evelyn. Ambot kaha kung wa ba sila mabahai sa Mandug sa kusog nga ulan niadtong Biyernes?
Daghan kaayong development sama sa pagtukod og bag-ong subdivision nga nakapuril sa mga kahoy nga mopugong sa pagdalus-os sa tubig gikan sa kabukiran.
Nagpadayon karon ang pagtukod sa 35 ka kilometro nga four-lane road gikan sa Buhangin ngadto sa Barangay Callawa diin ibutang ang Davao International Airport. Dungan kini sa pagpalapad sab sa Buhangin-Acasia highway diin ibutang ang North Overland Transport Terminal.
Di pod madayon ang among mga kalihukan kung wala ang ayuda sa abtik namong kamanghuran nga si Raul ug iyang mga alalay sa Royal Valley, Bangkal.
Lisud ra ba pagsulod sa ilang balay kay hastang lapuka tungod sa pag-ayo sa dalan padulong sa Central Park ug sa ancestral house ni PRody.
Nahimamat sa among inahan ang iyang mga higala nga dugay nang wala makita sama pananglit nila ni Mrs. Saragena nga asawa sa among kanhi mayor, Nang Emelia Tan nga 88-anyos nga inahan nila Sandy, Emilda ug Choya Tan, Nang Isabel Garotte nga inahan ni Zaldy ug Sister Beth, ug daghan pang kauban niya kanhi sa simbahan ug choral group sa lungsod.
Malipayon sab nga nahimamat sa akong mga igsuon ang ilang mga barkada sa high school ug college nga sa internet na lang tawon magkakita.
Nagpasalamat kami sa Kahitas-an nga gihatagan og maayong panglawas ug hataas nga kinabuhi aron makasalmot pa sa daghang umaabot nga "Pista sa Kinabuhi."