KALUOY sa oposisyon sa nasud. Si Bise Presidente Jojo Binay ra gyud intawon ang nitumaw nga tigpamaba sa mga yangongo batok sa administrasyon.

Wa gyuy ligdong diha? Nga­nong kining tawo nga magsigig lihay sa mga pasangil nga pangurakot may paminawon aron mobatbat sa mga isyo batok sa administrasyon?

Bisan na lang unta og maingon nato nga lesser evil kun kandidato nga di kaayo ngil-ad og kaagi sa kurapsyon.

Kabati ba karon nga kining tawo nga mangahas manaway nga hugaw ang administrasyon ni Presidente Noynoy Aquino mas hugaw pa sa kabaw nga naglunang sa lapok.

Mao nga kon unsa may iisa ni Binay nga isyo, malig-on ba kini nga akusasyon, moguwa nga pamulitika ra gyud ug gisibya sa mga tigpamaba nga lupig pay jukebox.

Nganong nakaingon ko nga lupig pa ang jukebox? Ki­ning jukebox man gud, hulgan gyud og sensiyo aron motingog. Apan kining mga tigmaba sa naila nga tiglikay sa isyong pangurakot, di man makuntento og sensiyo. Mangluod sab kon dugay moabot ang pahinungod.

Hinuon, naila ang kampo sa oposisyon nga mamahin. Dili boxer.

Lehitimong isyu

Alang kanako man gud, daghan kaayo ang mga lehitimong isyu nga angayang sumsoman karong umaabot nga piliay.

Pananglitan, angayang ang sunod presidente mosiguro nga di na niya ibalik pa ang pork barrel ug gani motuki sa sistema karon ug mohimog mga lakang nga mapapas ang mga nahabi­ling paagi sa pahinungod ginamit ang kaban sa lungsod.

Kinahanglan di na mabalik kining DAP.

Samtang padayong iduso ang pagtubo sa ekonomiya, mas mopaspas pa ang pagtubo kon ang benepisyo matagamtaman sa mas dakong bahin sa populasyon.

Tipik kini sa mga lehitimong mga isyo karon. Apan, malubog ang paghisgot niini tungod kay ang tigpamaba sa oposisyon mao man ang gitumbok nga labing kurakot karon sa nasud.

Ang makapasurop sa dugo kay lupig pa ang bungol sa iyang pagbungol-bungol sa grabing mga ebidensya nga nagtumbok kaniya nga nalamgibit sa pagpangawat sa kaban sa nasud.

Lalim bay igo lang ingnong pamulitika ra? Dayon siya ra ang nangampanya sugod kaniadtong 2010.

Edukasyon

Samtang nag-atang ko kanus-a mahuman ang graduation ceremony sa University of the Philippines Cebu sa miagi nga semana, nagtabi mi sa usa ka amigo nga naghisgot kabahin sa kahimtang sa edukasyon sa Syudad sa Talisay.

Matod niya, sa pipila ka gatos nga mogradweyt sa Grade 6 sa public elementary schools sa maong syudad, moabot lang og usa ka section matag tunghaan ang makamao mobasa ug mosulat.

Mao nga kon ­ ang entrance exam sa high school, di gyud intawon makapasar ang mayor­ya sa mga gradweyt sa maong syudad.

Nasayod ang akong higala niini kay suweto man siya sa resulta sa entrance test sa usa ka pribadong tunghaan sa maong syudad.

K2-12?

Masulbad ba sa K2-12 kining maong kahimtang? Klaro nga kining maong programa sa administrasyon ni P-Noy nagdugang lang sa mga problema sa atong sistema sa edukasyon. Di man kini solusyon kay lahi man ang sakit nga angay tambalan.

Mura bag pasyente nga nasakit og cancer pero gipatumar og tambal sa TB.

Nakahinumdom na hinuon ko sa usa ka abogado nga giingong nasakit og tuberculosis dinhi sa Sugbo apan dihang nagpa-check up sa Amerika, oi, lung cancer man ang findings.

Ang makapasubo kay kon si Binay ang mobandila sa ingon niining isyo, malubog hinuon ug magduda kita nga basin naka-interes og laing income opportunity. Brayt baya na. Dunay igong experience lagi kuno.

Sa iyang ka-brayt, nagsigig lihay kabahin sa mga pasangil nga duna siyay igong kasinati-an sa pangurakot.

(@anol_cebu sa Twitter)