HUMAN mapalimpyohi ni Tinago Brgy. Captain Joel Garganera ang sapa sa iyang barangay, tinguha na usab niya karon nga paninduton ang kilid niini.

Kon way mga kakulian, base sa plano, mahimong dapit nga suroyanan ug tambayanan ang kilid sa sapa nga kaniadto napuno sa lapok ug mga basura.

Ang sapa sa Tinago usa lang sa kasapaan sa dak­bayan sa Sugbo nga biktima sa pollution bunga sa pagpasagad sa paglabay sa basura ug way maayong hiniusang drainage system sa dakbayan sa Sugbo.

Gihimo ang kasapaan nga labayanan sa mga basura ug tubig nga hugaw gikan sa mga balay puluy-anan, patigayon ug pabrika. Tanang mga hugaw sa kasapaan gilabay.

Karon, mga Sugboanon ra gihapon ang nanag-antos sa pataka nga pagpanglabay sa mga putos.

Kon hunungon ang paglabay sa mga basura, ibal­hin ang mga agasanan sa hugaw nga tubig, inay sa sapa, ngadto na sa sa reservoir nga magsilbeng water treatment plant.

Kon nahimo kini sa ubang mga nasod, nganong di man dinhi?

Ang gihimo ni Garganera usa ka maayong ehemplo nga angay sundon sa ubang mga barangay nga dunay sapa.

Kaanindot kaha tan-awon nga ang hugaw nga sapa kaniadto, malimpyo ug mahimo nang suroyanan kay presko na ang hangin nga mahanggap.

Kaanindot kon ang sapa mahimo nang tinubdan sa tubig nga mahimong ipanglaba, ibubo sa tanom ug uban pa.

Kon nahimo ni Garganera, nganong di man mahimo sa ubang mga dapit sa Sugbo? Kon kini nahimo sa usa ka barangay kapitan, nganong di man mahimo sa mas dagko pang mga opisyal?