NAGSUGOD na sa pagpanghimo og mga Christmas lantern ang tanan nga mga piniriso sa Misamis Oriental Provincial Jail (MOPJ) nga nahimutang sa dalan Corrales-Luna St., Capitol Compound ning dakbayan sa Cagayan de Oro.
Gibutyag ni MOPJ Jail Warden Dominador Tagarda nga sa usa ka tuig kining mga bulana lamang makakwarta og dako ang mga piniriso aron ihatag nilang pinaskohan sa ilang tagsatagsa ka pamilya nga nabiyaan.
Dugang niini nga giawhag niya ang katawhan nga mopalit niini aron iadurno sa ilang mga panimalay hilabina doul na kaayo ang kasaologan sa pasko.
Matud ni Tagarda nga sa kadaghan nga mga katalagman sama sa mga natural nga kalamidad nga gakasinati karong panahona angayan lamang magpasalamat ang katawhan ug magselebrar sa kapaskohan.
Gawas nga makatabang sa mga piniriso ang halin niini makatabang pa kini sa ilang mga pamilya nga ilang nabiyaan gumikan sa pagkapriso. SVB