COTABATO CITY -- Usa ka mass grave ang nadiskubre alas 2:40 sa hapon niadtong Sabado, Septembre 30, sa probinsiya sa Maguindanao.
Gibutyag ni Joint Task Force Central spokesman ug CMO Mindanao Regiment commander Colonel Gerry Besana nga nadiskobre sa militar ug Moro Islamic Liberation Front (MILF) Task Force Ittihad ang dakong lubong sa grupo ni Shiek Esmail Abdulmalik, alyas Kumander Abo Torayfe sa Sitio Butalo, Barangay Tee, Datu Salibo, Maguindanao.
Moabot sa 15 ka tawo ang posibleng gilubong sa mga terorista sa mass grave niini.
Gisusi sab sa mga awtoridad ang mikatag nga taho nga patay na si Kumander Abo Torayfe.
Gawas sab sa mass grave sa mga patay sa Bangsamoro Islamic Freedom Fighters (BIFF)-Isis Inspired Group, nakalutan sab ang gipanglubong nga armas ug mga bala sa mga terorista.
Misaka na sa 73 ang napatay sa BIFF ug 22 sa MILF sa katag-katag nga panag-engkwentro sa Maguindanao.
Sa kasamtangan, nagpadayon ang air to ground assault sa militar batok sa BIFF uban ang tabang sa MILF Task Force Ittihad sulod sa SPMS Box sa probinsiya sa Maguindanao. (Edgar Fuerzas)