Apronianito Ferrater Miramon

Talisay, Santander, Cebu

INANAY na nga nanamilit ang ting-init. Aduna nay panagsang pag-ulan labi na sa hapon. Ang langit daw gisampungan og alkitran tungod sa mga dag-om nga nag-iyahay og pasunding. Apan nagpanghawid pa gihapon ang kaigang sa huyuhoy. Tingali mao kini ang nakaaghat kang Shantal ug sa iyang mga amigang dalaga aron magpabugnaw na usab didto sa Aguinid Waterfalls. Usa kini ka tourist attraction nga gihugopan dili lang sa mga langyaw, kundili apil na sab ang mga taga Sugbo mismo. Naa kini mahimutang sa Barangay Tangbu nga sakop sa lungsod sa Samboan.

Sa sinugdanan wala untay amor si Shantal kabahin ning maong gimmick. Usa man siya ka citygirl. Ug wa siyay kasinatian sa kinabuhi ug palibot sa probinsiya. Apan sukad niadtong katapusang Dominggo sa Marso nga maoy unang kasinatian niya sa pagkaligo dinhi sa Aguinid Waterfalls, ingon sa nahigalam si Shantal. Giimbitar lang siya niadto ni Nicole, iyang office mate. Buhong sa kasinatian ang una niyang pagtaak ning maong lugar. Nalamat siya sa kaanindot sa kalikupan, sa lunhaw ug labong nga kakahuyan nga maoy nagsalimbong sa tinaguang katahuman. Wala palandunga ni Shantal nga aduna diay kinaiyanhong katahom ang Aguinid Waterfalls. Ang nagpangamay nga kabugnaw sa nag-ambak ug tin-aw nga tubig. Labi pa nga wala damha ni Shantal nga aduna sab diay anak ni Adonis ang maong dapit.

“Ako diay si Michael,” mipaila ang usa ka lalake. “Pero mas nailhan ko diri sa akong angga nga Ikeng. Ako ang inyong Technical Guide.”

Ingon sa naamang ang ilang grupo (kay pulos man sila dalaga) tungod sa kaambungan ni Michael. Wala nila kalikayi nga makatutok silang tanan sa ilang technical guide.

“Ako nay dala sa inyong mga gamit,” tanyag ni Michael ngadto kanila. “Walay mawala niining tanan kay di man ko kawatan.” May dalang pasiaw ang mga pulong ni Michael.

“Adto ta sa second level kay nindot kaayo ang mga talan-awon didto,” matod ni Michael ngadto sa grupo dihang andam na silang manglakaw.

Human niadto halos kada Dominggo moadto sa Aguinid Waterfalls ang grupo. Utasan gyud nilag biyahe’g bale og upat ka oras gikan sa dakbayan sa Sugbo. Tambalan nila ang gibating kaigang sa ilang mga lawas sa pagkaligo sa bugnawng tubig nga gipadagayday sa kinaiyahan. Ug mabusog ang ilang mga mata sa kaanindot sa palibot. Nahimo sab nilang suki nga technical guide si Michael. Nasuod na nila kini. Gani makasakay na man kini sa ilang mga pasi-aw.

“Uy! Naunsa man ning kalakiha!” matod ni Anne, ang pinakasipat sa grupo. “Ang technical guide wa na man mogiya nato. Nagpaulahi na man hinuon!”

Halos magkadungan pagpanglingi ang grupo. Maoy natukmaan sa ilang panan-anga seryusong nag-estoryahay si Shantal ug Michael nga nagpaulahi kanila. Nakahukom sila nga ila na lang kining pasagdan.

“Single ka pa ba, Michael?” mapanagan-on nga pangutana ni Shantal nga mitan-aw sa lalake.

“Minyo na ko, Shantal, ug aduna nay duha ka anak,” tug-an ni Michael.

Paghimuntog nila sa second level sa busay nabantayan sa grupo nga ingon og wala sa mood si Shantal. Nawala ang kahinam ug kasayag sa panag­way niini sahi sa nangagi nilang pagpangaligo. Wala gani kini molun-oy sa tubig. Karong higayuna sayo nga mingkawas gikan sa tubig ang grupo. Lahi sa niagi nilang pagpangaligo dinhi, nga hapon na kaayo silang nangundang. Morag natakdan sila sa gipakitang mood ni Shantal.

‘Katapusan na lang ni nakong anhi dinhi sa Aguinid,” gibuak ni Shantal ang kahilom samtang nagluwan na sila sa Ceres Bus balik sa dakbayan sa Sugbo.

“Ngano man?” halos magkadungan sa pagpangu­tana ang mga barkada ni Shantal.

“Tungod kang Michael, no?” sulog-sulog ni Kisha.

“Dili no!” pangulipas ni Shantal nga mibati og kapikal.

“Unsa man imong rason, bi?” ni Anne.

“Tungod kay gipul-an na ko!” pinabundak nga tubag ni Shantal, dayong patuyok sa iyang kalimutaw, timailhan nga wala siya magtug-an sa tinuod. (Katapusan)