Mongaya: Basura mahimong kuryente

MAKADASIG nga pa­lan­dungon kining pagsanong sa pipila ka mga konsehal sa oposisyon sa Syudad sa Sugbo niining planong magtukod og planta nga mo-convert sa basura ngadto sa kuryente. Gitawag kini nga WTE kun Waste to Energy.

Mao kini ang akong reaksyon dihang nabasa nako ang balita nga sila si Konsehal Joel Garganera ug Raymond Garcia uyon sa maong plano ni Mayor Tomas Osmeña.

Samtang naghisgot sila si Kons Joel ug Raymond nga duna pay mga legal issues nga angayang plantsahon, wa koy nakitang dakong problema kay kining waste-to-energy nga teknolohiya naa na man sa Syudad sa Naga sukad pa sa 2010.

Dunay kapasidad ang material recovery facility sa Naga nga mo-proseso og basura nga maoy gigamit pipila na ka tuig sa power plant diha sulod sa Cemex. Inisyatiba kini ni Mayor Val Chiong sa Naga ug ang chairman sa Naga Chamber of Commerce and Industry nga si Paul Revalde.

Dugay na kitang nagduso niini kay nakita man gud nato nga posible gyud kini basi sa kasinatian sa Naga ug sa Taipei, Taiwan. Una nakong nakita kini kaniadto pang mga 2008 dihang gipakuyog ko sa usa ka delegasyon sa mga sakop sa media nga nitan-aw sa mga power plant didto sa Taipei, Taiwan.

Sa mga planta nga among gibisitahan mao kining usa ka incinerator nga nisunog sa mga basura ug mao kiniy nagpatuyok sa mga electric turbines sa maong planta.

Dayon way kulba nga makadaot kini sa kinaiyahan kay mas abante kini nga teknolohiya kon itandi sa kaniadtong mga makasamot hinuon sa polusyon.

Lalim bay ang revolving restaurant nga among gikan-an naa sa ibabaw sa panghaw sa maong power plant. Sa ubos, among makita ang usa ka playground. Makita sab namo ang pipila ka mga nag-bisikleta sa usa ka bike lane. Sa usa ka lapad nga sapa sa duol lang, dunay nag-canoe.

Matod pa sa among guide, mga pipila ka dekada nga milabay, naaghat ang mga opisyal sa ilang kagamhanan nga moestrikto sa ilang mga environmental laws kay grabi na kaayo ilang polusyon.

Ug tuod man, nalimpyo nila ang ilang kinaiyahan.

Nasiguro ko nga kon magkasinabot lang ang mga opis­yal sa Syudad sa Sugbo, mahinayon kining giingong nga planta nga Waste-To-Energy dinhi sa Syudad sa Sugbo.

Pagbabago

Nag-anunsyo ang mga ka­dagkuan sa Kilusang Pagbabago, usa ka pro-Duterte nga kapunongan, nga magpahigayon sila sa ilang Lihuk Suporta 2 karong Sabado Oktubre 7, 2017 diha sa Plaza Independencia.

Matod pa, ilang ipakita ang ilang padayong pagsuporta kang Presidente Duterte alang sa pagkab-ot sa tinuod kausaban.

Apan lahi sa ubang mga grupo, dili sila mobasol sa mga giingong Dilawan (@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph