ANG pagpaambit ngadto sa imong isigkaigon sa imong nadawat nga grasya matawag nga “indulhensya.”
Dunay mga tawo nga ilang gihimo nga tulumanon ang pagpaambit sa ilang grasya ngadto sa mga kabus.
Niay dalaygon nga buhat sa usa sa mga simbahan dinhi sa dakbayan sa Sugbo nga gipaluyohan sa nagkalain-laing mga kapunongan nga gidumala usab sa parokya.
Dugay na kini nga buhat nga nahulog nang naandan na.
Ang Santo Rosario Parish Church nag apod-apod og mga pagkaon alang niadtong mga tawo nga anaa manimuyo o nanginabuhi daplin sa kadalanan sa siyudad matag Biyernes sa buntag.
Wa silay gipili kon kinsa kadtong ilang hatagan basta moapil.
Apan sa dili pa kini idalit kanila ang pagkaon, gidapit silang tanan sa pagtambong sa usa ka misa isip pagpasawo usab kanila sa mga pulong sa Ginuo.
Pinaagi niini, duha ang gibusog, ang panginahanglan sa espiritu ug ang ikaduha, sa pisikal nga lawas.
Pagka human sa misa, isunod dayon ang pag apod-apod sa mga plastic nga may sulod nga poso, bolabola, manok nga prIto ug uban pa, depende kon unsay moabot nga donasyon sa simbahan.
Si Wena Contreras, anaa manarbaho sa Sto. Rosario Parish Church sa dalan P. Del Rosario, nagkanayon nga nagsugod ang ilang pagpanghatag sa pagkaon sukad pa sa dekada 90, atol sa pagdumala ni Monsenyor Esteban Binghay.
Kini gipadayon hangtod karon ubos sa pagdumala ni Cebu Auxiliary Bishop Oscar Florencio.
Ang simbahan nag-agad sa gidonar nga mga pagkaon, matod ni Contreras.
Ilang angayon sa pagputos ang mga pagkaon, inabagan sa pipila ka mga kawani ug volunteer sa simbahan sa di pa nila kini ipang-apod.
Lakip sa mga sponsor sa feeding ang mga kapunongan sa mga lay minister, charismatic community, taga parokya ug mga indibidwal nga andam mopaambit sa ilang grasya.
Ingon pang Contreras, sa pagsugod sa ilang programa, labing daghan 50 ka mga tawo ang makapahimulos.
Apan karon, moabot na og 200 ngadto sa 250 ka mga tawo matag Biyernes, lakip sa mga bata nga anak sa mga magtiayon nga moapil og linya.
Si Belinda Baed, usa ka magpapatigayon, lakip sa mga tawo nga niapil sa pagdonar og pagkaon.
Apil usab siya sa pagpamutos sa pagkaon. Gaan ang iyang paminaw mahatag higayon nga iya kining buhaton.
Ang parokya modawat sa mga donasyon alang ning mao nga programa.