GISUPAK sa mga sumasakay ug nagpakabana nga grupo sa mga kabos ang gipangayo nga P1 nga umento sa minimum nga plitehan sa Cebu Integrated Transport Multi-Purpose Cooperative ug P1.50 sa Basak Lapu-Lapu City Jeepney Operators and Drivers Association.
Atol sa public hearing nga gipasiugdahan sa Land Transportation Franchising and Regulatory Board (LTFRB) 7 kagahapon, ang Kilusang Pagbabago ug pipila ka mga sumasakay nisugyot nga 50 sintabos ang ihatag nga usbaw sa minimum nga plitehan sa mga public utility jeepney.
Si Cris Gabrillo, taga Kinasang-an, siyudad sa Sugbo, miyembro sa Consumers’ Group, nipadayag nga dako ra ang P1 ug P1.50 nga plite.
Matod niya kadaghan sa mga drayber og PUJ dili mosukli og 50 sentabos samtang ang uban dili mohatag og diskwento sa mga senior citizen sama niya.
Si Atty. Ennoh Chentis Fernandez, chairman sa Kilusang Pagbabago Cebu Province, namahayag nga way basehanan ang gipangayong umento sa duha ka grupo kay usahay moubos ang presyo sa lana.
Si Engr. Rodrigo Tanza, Jr., vice chairman sa KP Cebu Province, niingon nga angay mopakita og survey ang Citrasco ug BALACJODA, nga magmatuod nga gikinahanglan ang P1 ug P1.50 nga umento sa plitehan.
Sumala niya kon umentohan ang plite sa PUJ, angay sab usbawan ang plite sa trisikad, trisikol ug habalhabal.
Si Allan Cuizon, laing sumasakay, nipadayag nga mosumbalik sa mga drayber ang gipangayo nga umento sanglit ang ilang mga pamilya mosakay usab og PUJ.
“Ang akoa lang mas maayo ari ta mag-abot sa 50 sentabos nga saka,” dugang niini.
Si Jaime Arapoc, presidente BALACJODA, nagkanayon nga gumikan sa pagsaka og P13 sa minimum nga sweldo, pagsaka sa presyo sa piso ug lana ingon man trapik, nikunhod ang ilang kita mga drayber.
Si Lazaro Napuli, corporate secretary sa BALACJODA, niingon ang P6.50 nga minimum nga plitehan sa unang lima ka kilometro napatuman sukad pa niadtong 1998 samtang sa ubang mga rehiyon, P8 na ang minimum nga plitehan sa unang upat ka kilometros.
Siya nidugang gikan sa Enero 2016 hangtod sa Mayo 2016, ika 20 ka higayon, nisaka ang presyo sa mga produktong petrulyo.
“Unta mosabot mo sa sitwasyon namo mga driver nga kinahanglan pud namo mo-increase og gamay ang among panginabuhian kay naa pud mi gipakaon. Kon naa moy panginahanglan, kami pud naa puy panginahanglan,” dugang niini.
Si Romeo Armamento, national vice president National Confederation of Transport Workers Union (NCTU) Visayas, nipadayag angay na wagtangon ang 50 sentabos nga tensyon pinaagi sa P1.50 nga usbaw.
Si LTFRB 7 Director Ahmed Cuizon sa sunod semana iduso nila sa nasudnong buhatan ang tanang input, data, mga dokumento ug baruganan nga nakuha sa public hearing.
Si Atty. Edwin Antepuesto, hearing officer sa LTFRB 7, nihatag og tulo ka adlaw sa ubang sektor nga moduso sa ilang manifestation ug baruganan kon uyon ba sila sa umento.