NADAYON niadtong Hunyo 26 ang Herbal and Food Supplement Congress nga gipahigayon didto sa Capernaum Health Facility sulod sa Southern Philippine Medical Center Compound, usa ka pasilidad nga gi-donar sa DMI Medical Supply Inc. alang sa mga kabus nga pasyente.
Dul-an 40 ka mga delegado gikan sa upat ka rehiyon sa Mindanao ang mitambong.
Ilang gi-representahan ang industriya sa herbal, alternatibo ug inato nga medisina sama sa alternative medicine practitioners, manufacturers, producers, marketing and networking groups, inventors, researchers, scientists, raw material farmers, consumers, media, ug herbal advocates.
Nalisang ang industriya nga mahanaw tungod sa palisiya ug regulasyon sa gobyerno nga pabor sa western o traditional medicine nga gipaluyohan sa mga higanteng multi-national drug corporations.
Dinhi sa atoa, kanya-kanyang kayud ug paningkamot kay hastang daghanang babag gikan sa paghimo hangtod sa pagparehistro ug pagbaligya sa inato nga produkto.
Niadtong 2010 nagpaguwa ang Food and Drugs Administration ug administrative order nga butangan og deklarasyon nga "dili makaayo sa bisan unsang sakit ug dili puwedeng gamitong tambal" ang tanang ads sa produktong herbal ug food supplement sa merkado.
Dako ang papel sa Philippine Medical Association sa paghimo sa maong "caveat" nga gikapungot sa industriya nga inay suportahan, gipatay na man hinuon taliwala sa daghang pagmatuod nga makatabang kini sa panglawas sa tawo basi sa pagtuon ug personal nga testimonya sa naggamit.
Nahimong dinamit nga mamumulong si lawyer Lorna Filipino, kanhi opisyal sa BFAD-National ug karon nagtabang sa Chamber of Herbal Industry in the Philippines, Inc. (CHIPI) nga maoy nasudnong organisasyon sa herbal, alternatibo ug inato nga medisina sa Pilipinas.
Busa gitukod ang Mindanao counterpart sa CHIPI ubos sa iyang inisyal nga pangalan nga Philippine Traditional and Alternative Medicine Association, Philippine Herbal and Alternative Medicine Association og Herbal Association of Asia.
Gihisgutan usab sa asembliya ang pagpahigayon sa First Mindanao Herbal and Alternative Medicine Summit sa bulan sa Agosto diin posibleng dinapit nga mamumulong ang mga politikong modagan sa hataas nga puwesto ug kadtong adunay tiunay nga pagbati sa produktong Pinoy.
Unta dili kalimtan ang ACID Test sa mga napiling opisyal. Congrats ug salamat Doc Mimi ug Rosie Miguel sa secretariat.