ANG matag katapusan mao'y kanunay nga sinugdanan alang sa bag-ong mga butang ug kini ang nagpamatuod sa atong bida karong adlawa nga si Davao Regional State Prosecutor Antonio Arellano, kinsa nakatakdang moritero gikan sa pagserbisyo sa publiko, diin alang niya, "work never stops."

Siya nagtrabaho sud na sa 23 ka tuig sa Department of Justice (DOJ) diin nagsugod siya isip State Prosecutor II ug gituboy isip RSP sa nagkalain laing higayon sa Northern Mindanao, Central Visayas ug Zamboanga Peninsula.

Ang atong bida gianak niadtong Hulyo 11, 1950 sa Iloilo City, nagtungha siya sa Tuburan Central Elementary School sa 1962 ug Iloilo City Colleges sa tuig 1966 sa iyang hayskol.

Siya ang kamanghuran sa iyang pamilya, diin iyang gisaysay nga sa iyang pagtungha sa kolehiyo gipundohan kini sa Jesuit Foundation gumikan way ikasarang sa pagpatungha ang iyang mga igsuon human sayong nawala kanila ang ilang inahan ug amahan.

Nahuman niya ang kursong Bachelor of Arts Major in Economics sa Ateneo de Cagayan o mas ilado nga Xavier University niadtong 1969 ug nahuman sab dayon niya ang Master of Arts in Economics sa Notre Dame University sa tuig 1971.

Human sa iyang pagtungha, nakaplagan dayon niya ang iyang unang gugma sa pagtudlo sa tuig 1971 diin nahimo siyang full-time professor sa Economics sa Xavier University ug gilayong nabalhin sa samang tuig sa Ateneo de Davao University (AdDU).

Samtang nagtudlo, padayon sab siyang nagtungha ug nahuman niya ang iyang Bachelor of Laws sa AdDU, nakapasar sa bar exam sa tuig 1976 ug nanudlo sa "laws school" sa maong unibersidad sa tuig 1978.

Una siya nagtrabaho sa gobyerno, kon diin duna siyay adbokasiya sa "human rights" kinsa nagtabang sa mga dinaugdaug nga katawhan.

Ilado siya sa iyang mga staff isip maoy nag-inisyatibo aron mapabiling han-ay ug limpyo ang iyang opisina.

"You cannot be productive if your working condition is not conducive for creativity, efficiency. You must be happy in your working area,” dugang sa atong bida.

Tuig 2011, nahimo siyang usa sa mga Datu Bago Awardee kinsa usa sa mga nakahatag og dakong kontribusyon sa paglambo sa dakbayan sa Davao.

Nagasahan og usa ka mahigugmaon nga asawa, tulo ka mga anak ug tulo ka mga apo diin nagtan-aw sa daghang mga interesado nga mga panahon ug mga hagit sa mga katuigan.

Ug sa iyang pagtapos sa iyang karera sa gobyerno, iyang balikan ang iyang iyang unang gugma nga mao ang pagtudlo.

Sa imong way-puas nga pagdiskubre sa kinabuhi, Prosecutor Antonio Arellano, diha kami saludo nimo!