USA ka rebeldeng New People's Army (NPA) ang misurender sa militar alas 2:00 sa hapon niadtong Biyernes didto sa Lungsod sa North Cotabato.
Gi-ila ang rebelde nga si alyas Dodong nga naglihok sa Calinan District Davao City.
Si alyas Dodong mitahan sa kaugalingon ngadto kang Philippine Army's 57th Infantry Battalion (IB) Commanding Officer Colonel Jose Rustia.
Matod ni alyas Dodong nga siya mibalik sa sabakan sa balaod gumikan wala na siya makasabot sa ilang gipakigbisugan ug gikapoy na sab siya og tago-tago sa kabukiran.
Dala sa pagsurender sa rebelde ang usa ka M16 Armalite rifle ug mga buhing bala apil na ang mga importante nga dokumento sa NPA.
Gikanayon ni 57th IB Chief Captain Manuel Gatus nga usa pod sa mga hinungdan nga gibiyaan ni alyas Dodong ang kalihukan gumikan wala gituman sa mga NPA ang ilang gipasalig nga pa-eskuwelahon ang iyang mga anak ug suweldo matag bulan.
Mismo ang mga paryente ug kaila ni alyas Dodong sa Makilala ang miduol sa 57th IB alang sa malinawon nga pagsurender niini.