GIPUSIL patay ang usa ka waitress gawas sa gitrabahoang videokehan sa Bansalan, Davao del Sur alas 10:10 sa gabii, Biyernes.

Gi-ila ang biktima nga si Salve Sarabia, alyas Apple, 24.

Subay sa imbestigasyon sa kapulisan, nasayran nga unang nakighinabi ang biktima sa tulo ka lalaki gawas sa videokehan nga gipanag-iyahan ni Saturnino Antonio kon diin siya nagtrabaho.

Gibutyag ni Chief Inspector Jeffrey Latayada, hepe sa Bansalan Police Station, nga kalit lang milanog ang usa ka buto sa armas nga nadunggan ni Antonio ug dihang gisusi ang nahitabo.

Nakit-an na lamang niini nga nagbuy-od na ang biktima sa yuta nga naligo sa kaugalingong dugo.

Matod ni Latayada nga nakaangkon og samad sa ulo ang biktima. Apan di pa masulti ni Latayada kon unsa ang motibo sa krimen samtang nagpadayon pa ang imbestigasyon.

Gipangita na sa kapulisan ang mga kriminal human paspas nga misibat.