Trapik sa N. Bacalso hayan mograbe, pahimangno sa Citom

GIPAHIMANGNOAN ang publiko, hilabi na ang mga motorista nga mopaingon sa habagatang bahin sa Cebu, tungod kay gipanglantawan nga mas mohuot pa ang dagan sa trapiko sa N. Bacalso Ave., eskina F. Llamas street, sa dakbayan sa Sugbo.

Kini tungod kay sirhan na pud ang parte sa lane atubangan mismo sa McDonalds aron ma-lay out na sa kontraktor ang pundasyon sa parehong habig subay sa gihimong trabaho sa underpass.

Matod ni Engr. Roy dela Cruz, project engineer sa Department of Public Works and Highways (DPWH) 7, nga magkigtagbo siya sa kontraktor sa proyekto aron pagahisgutan ang trabahuon sa southbound lane.

“Once the plans are finalized, we will immediately start the work in the following week, or on Oct. 11,” sa pakighinabi niini sa SunStar Cebu.

Dugang ni dela Cruz nga sa pagkakaron, ila nang gihawanan ang nahabilin nga lane habig sa Shopwise aron magamit na unya kini sa mga motorista.

Ang Cebu City Transportation Office head nga si Francisco Ouano nagkanayon nga mohuot ra ang dagan sa trapiko sa pag-implementar nila niini sa unang mga adlaw.

Hinuon, anaa na sila’y diversion route nga giplastar.

Sa pagkakaron, mohuot lang ang dagan sa trapiko sa dapit kon rush hour tungod kay sa pagkakaron, way diversion road nga gigamit ug susama nga rota kaniadto ang gigamit.

“What happens when the road in front of McDonalds will be closed, that all southbound vehicles will have to pass through pocket roads.”

Gitambagan ang mga motorista nga paingon sa habagatan nga mogamit sa pocket roads susama sa Caimito St., Ma. Gochan St., Ganciang St., ug Katipunan St., dayon liko sa F.Llamas St., paingon sa ilang destinasyon.

Mamahimo usab nga moagi sa Tagunol St., kadtong paingon sa dakbayan sa Talisay.

Ang P683 milyones nga underpass project gisugdan niadtong Agosto 8 ning tuiga.

Wa usab dayon kasugdi ang proyekto kay gihawanan ug giayo pa ang diversion roads.

Gipaabot nga mahimong tipik sa Bus Rapid Transit (BRT) ang mao nga proyekto. (SunStar Cebu)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph